Rakul Preet Singh News: रकुल प्रीत सिंग, निर्माता वासू भगनानीशी संबंधित 12 ठिकाणी IT चे छापे, तपास सुरू; नेमकं प्रकरण काय?

मुंबई: आयकर विभागाच्या मुंबई शाखेने अभिनेत्री रकुल प्रीत सिंग सोबत तिचे सासरे आणि निर्माते वाशु भगनानी यांच्या संबंधित 12 ठिकाणी छापे टाकले आहेत. मिळालेल्या माहितीनुसार, टॅक्स चोरी आणि आर्थिक नियमितता झाल्याच्या संशयामुळे सोमवारी सकाळी ही कारवाई करण्यात आली. शिवाय, चित्रपटाच्या नावाखाली परदेशात पैसे पाठवल्याच्या संशयामुळे अनेक सेलिब्रिटींना आणि प्रॉडक्शन हाऊसला मोठ्या कारवाईला सामोरे जावे लागणार आहे. आयकर विभागाकडून रकुल आणि तिच्या सासऱ्यांसंबंधित सर्व ठिकाणांवर एकत्र छापा टाकण्याची मोहिम राबवली. आयकर विभागाच्या अधिकाऱ्यांनी एकत्र छापेमारी टाकल्यामुळे भगनानी कुटुंबीय गोत्यात सापडले आहेत.

टीव्ही 9 च्या वृत्तानुसार, सोमवार, 28 सप्टेंबर रोजी, आयकर विभागाने रकुल प्रीत सिंग आणि वासू भगनानी यांच्याशी संबंधित 12 ठिकाणी एकाच वेळी धाड टाकली आहे. ही कारवाई नेमकी किती वेळ चालेल? हे सांगणं अशक्य आहे. मुंबई आयकर विभागाच्या पथकाकडून परदेशी व्यवहारांसंबंधीची कागदपत्रे, आर्थिक नोंदी आणि तपशिलांची चौकशी करत आहेत. मिळालेल्या माहितीनुसार, चित्रपट शुटिंग, परदेशी वितरण आणि निर्मितीच्या नावाखाली मोठ्या प्रमाणात पैसे परदेशात पाठवले जात असल्याची माहिती आयकर विभागाला गेल्या काही दिवसांपासून अशी माहिती मिळत होती. आयकर विभागाला या संपूर्ण प्रक्रियेमध्ये टॅक्स चोरी आणि आर्थिक नियमितता झाल्याचा तपास यंत्रणांना संशय आहे.

तपास यंत्रणेकडून मुंबईतील वेगवेगळ्या कार्यालयांमध्ये तपास सुरू आहे. तपास पूर्ण झाल्यानंतर आयकर विभागाकडून संपूर्ण प्रकरणाची माहिती मिळण्याची शक्यता आहे. अभिनेत्री रकुल प्रीत सिंग हिने प्रसिद्ध निर्माते वासू भगनानी यांचा मुलगा जॅकी भगनानीसोबत 2024 मध्ये लग्नगाठ बांधली आहे. या प्रकरणामध्ये रकुल प्रीत सोबत तिचे सासरे वासू भगनानी यांचेही नाव समोर आले आहे. वासू भगनानी यांच्या मालकीची 'पूजा एंटरटेनमेंट' हे प्रॉडक्शन हाऊस आहे. या कंपनीने अनेक बॉलिवूड चित्रपटांची निर्मिती केली आहे. इतकंच नाही, तर 'दृश्यम' या लोकप्रिय फ्रँचायझी चित्रपटाची निर्मिती करणाऱ्या पॅनोरमा स्टुडिओशी संबंधित ठिकाणीही आयकर विभाग शोधमोहीम राबवत असल्याचं वृत्त आहे.