Anamika Mishra: वय अवघं 7 वर्ष; लक्ष्य 30 किलोमीटर! अनामिकाच्या धाडसी आव्हानाची चर्चा

नवी दिल्ली: 'मुर्ती लहान पण किर्ती महान' ही म्हण आपण ऐकली असेल. या म्हणीचा प्रत्यय सहसा आपल्याला लवकर येत नाही. पण या म्हणीचा प्रत्यय उत्तर प्रदेशातील एका 7 वर्षीय मुलीबद्दल आला आहे. उत्तर प्रदेशातील गोंडा जिल्ह्यातील अनामिका मिश्रा वयाच्या 7 व्या वर्षी 30 किलोमीटर शर्यत पूर्ण करण्याचं लक्ष गाठणार आहे. येत्या 2 ऑक्टोबरला महात्मा गांधींच्या जयंतीच्या दिवशी अनामिका हे लक्ष गाठणार आहे. विकास खंड इटियाथोकच्या भीखमपुरवातील प्राथमिक विद्यालयामध्ये अनामिका दुसऱ्या इयत्तेत शिक्षण घेतेय. तिने गांधी जयंतीच्या दिवशी घेतलेल्या अनोख्या लक्षाची सध्या उत्तर प्रदेशमध्ये जोरदार चर्चा होत आहे. 7 वर्षीय, अनामिकाने 2 ऑक्टोबर, महात्मा गांधी जयंतीच्या दिवशी, तिच्या शाळेपासून गोंडा येथील गांधी पार्कपर्यंत 30 किलोमीटरची शर्यत पूर्ण करण्याचे ध्येय ठेवले आहे. अनामिकाचे वडील आणि शाळेचे मुख्याध्यापक, मनोज कुमार मिश्रा म्हणाले की, माझ्या मुलीने गेल्या वर्षीच तिची प्रतिभा सिद्ध केली आहे. गेल्या वर्षी, तिने आठ मिनिटांत 240 पुश-अप्स पूर्ण करून 'इंडिया बुक ऑफ रेकॉर्ड्स'मध्ये स्वत:चं नाव नोंदवलं होतं. त्यानंतर, तिने गांधी जयंतीच्या दिवशी, हातात तिरंगा घेऊन अवघ्या एका तासात 10 किलोमीटर धावून सर्वांना आश्चर्यचकित केले होते. त्यानंतर ती पुन्हा एकदा महात्मा गांधी जयंतीच्या दिवशी स्वत:च्या नावावर रेकॉर्ड करण्याच्या तयारीत आहे. अनामिका 30 किमीची दौड 2 तास 45 मिनिटांमध्ये पूर्ण करणार आहे. सकाळी सहा वाजेपासून अनामिकेच्या शाळेपासून दौडला सुरूवात होणार आहे. अनामिकाचे वडील मनोज कुमार यांनी सांगितले की, "अनामिका गेल्या अनेक महिन्यांपासून 30 किलोमीटरच्या रनिंगची तयारी करत आहे. गेल्या 15 दिवसांपासून ती हातात तिरंगा घेऊन गावाभोवती 30 किलोमीटर धावण्याचा सराव करत आहे. आता 2 ऑक्टोबर महात्मा गांधी यांच्या जयंतीच्या दिवशी शक्य तितक्या कमी वेळेत 30 किलोमीटरची शर्यत पूर्ण करण्याचे तिचे ध्येय आहे." आठ मिनिटांत 240 पुश-अप्स पूर्ण करून अनामिकाने इंडिया बुकमध्ये स्वत:च्या नावाचा रेकॉर्ड केला होता. आता त्याचप्रमाणे यावेळी सुद्धा कोणता नवीन रेकॉर्ड ती स्वत:च्या नावावर करणार का? हे पाहणं महत्त्वाचं ठरणार आहे.