मुंबई : छत्रपती शिवाजी महाराज टर्मिनस (CSMT) येथील यार्डमध्ये बुधवारी पहाटे सीएसएमटी-हावडा दुरंतो एक्सप्रेसच्या रिकाम्या रेकमधील पॅन्ट्री कारला आग लागल्याची घटना घडली. ट्रेन क्रमांक 12261 च्या SCR/192967 क्रमांकाच्या पॅन्ट्री कारमध्ये ही आग लागली. सुदैवाने या घटनेत कोणतीही जीवितहानी झालेली नाही.
रेल्वे प्रशासनाच्या माहितीनुसार, बुधवारी पहाटे सुमारे 3:40 वाजता पॅन्ट्री कारमधून धूर येत असल्याचे लक्षात आले. त्यानंतर तातडीने अग्निशमन दलाला माहिती देण्यात आली. अग्निशमन दलाचे जवान पहाटे 4:01 वाजता घटनास्थळी दाखल झाले. जवानांनी तत्काळ आग विझवण्याचे काम सुरू केले आणि अवघ्या काही मिनिटांत आगीवर नियंत्रण मिळवले. (Train Fire)
भारतीय महिला कंपाऊंड तिरंदाजी संघाने आशियाई क्रीडा स्पर्धेत शानदार कामगिरी करत सुवर्णपदक पटकावले आहे. अंतिम सामन्यात भारतीय संघाने चीनचा पराभव करत ...
सुदैवाने प्रवासी नसल्याने जीवितहानी टळली
आग लागली त्यावेळी ट्रेनचा रेक यार्डमध्ये रिकामा होता. त्यामुळे पॅन्ट्री कारमध्ये कोणताही प्रवासी उपस्थित नव्हता. या घटनेत कोणालाही दुखापत झालेली नसल्याचे रेल्वे प्रशासनाकडून सांगण्यात आले आहे. आग विझवताना पॅन्ट्री कारमधून मोठ्या प्रमाणात धूर बाहेर येत असल्याचे दिसून आले. घटनेची माहिती मिळताच परिसरात काही काळ गर्दीही झाली होती. ( Howrah Duronto Express)
ट्रेनच्या वेळेत बदल
दरम्यान, या आगीच्या घटनेचा परिणाम हावडा दुरंतो एक्सप्रेसच्या नियोजित वेळेवर झाला. ही ट्रेन 29 सप्टेंबर रोजी सायंकाळी 5:15 वाजता CSMT येथून हावड्याच्या दिशेने रवाना होणार होती. मात्र, रेल्वे प्रशासनाने ट्रेनच्या वेळेत बदल केला.
मध्य रेल्वेच्या मुंबई विभागाकडून देण्यात आलेल्या माहितीनुसार, ट्रेन क्रमांक 12261 CSMT-हावडा दुरंतो एक्सप्रेस आता 30 सप्टेंबर रोजी सकाळी 8:30 वाजता रवाना होणार आहे. त्यामुळे प्रवाशांनी प्रवासाला निघण्यापूर्वी ट्रेनच्या सुधारित वेळेची माहिती तपासून घेण्याचे आवाहन करण्यात आले आहे.
दरम्यान, पॅन्ट्री कारला आग नेमकी कोणत्या कारणामुळे लागली, याबाबतची माहिती अद्याप समोर आलेली नाही. रेल्वे प्रशासनाकडून घटनेची पुढील चौकशी केली जात आहे.