‘सीजेपी’च्या आंदोलनाआडून उमर खालिद, शरजील इमामला ‘हिरो’ बनविण्याचा प्रयत्न; मंत्री नितेश राणेंनी उपस्थित केला सवाल

मुंबई : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉकरोच जनता पार्टीच्या (सीजेपी) वतीने मुंबईत आंदोलन सुरू असतानाच, या आंदोलनातील काही फलकांवरून मंत्री नितेश राणे यांनी प्रश्न उपस्थित केला आहे. आंदोलनात सहभागी एका महिलेच्या हातातील फलकावर ‘फ्री उमर खालिद’, ‘फ्री शरजील इमाम’, तसेच ‘फ्री अवर पॉलिटिकल प्रिझनर्स’ आणि ‘फ्री अवर इंटेलेक्ट, फ्री अवर स्कॉलर्स’ अशा घोषणा लिहिल्याचे दिसत आहे. हा फोटो राणे यांनी सोशल मीडियावर शेअर करत ‘उघडा डोळे, बघा नीट!’ असे आवाहन केले आहे.

The real demand !

उघडा डोळे बघा नीट ! pic.twitter.com/NAnbSmyW5W

— Nitesh Rane (@NiteshNRane) October 2, 2026

दरम्यान, कॉकरोच जनता पार्टीकडून (सीजेपी) शिवाजी पार्क येथे आंदोलन सुरू असताना या आंदोलनाच्या विरोधात ‘जेन नेक्स्ट’ रस्त्यावर उतरले. मंत्रालय परिसरात जेन नेक्स्टकडून आंदोलन करण्यात आले. त्यामुळे मुंबईत एकाच वेळी सीजेपीच्या समर्थनार्थ आणि त्याच्या विरोधात अशी दोन आंदोलने सुरू झाल्याचे चित्र शुक्रवारी पाहायला मिळाले.(Nitesh Rane)

देशभरातील एसआयआर प्रक्रियेवरून विरोधी पक्षांकडून मुख्य निवडणूक आयुक्त ज्ञानेश कुमार यांच्यावर आरोप करण्यात येत आहेत. या पार्श्वभूमीवर अभिजीत दिपके यांच्या नेतृत्वाखालील सीजेपीने ज्ञानेश कुमार यांच्या राजीनाम्याची मागणी केली आहे. तसेच एसआयआर प्रक्रिया रद्द करावी आणि २०२९ची निवडणूक २०२५च्या मतदारयादीच्या आधारे घ्यावी, अशा मागण्याही पक्षाकडून करण्यात आल्या आहेत. या मागण्यांसाठी शिवाजी पार्क येथे सीजेपीचे आंदोलन सुरू असताना त्याला विरोध करण्यासाठी जेन नेक्स्ट मंत्रालय परिसरात जमले. “सिजेपी राजकारण करत आहे. आम्ही संविधान मानणारे लोक आहोत. मात्र अभिजीत दीपके आणि त्यांचे सहकारी संविधान मानत नाहीत. त्यामुळे त्यांच्या आंदोलनाला विरोध करण्यासाठी आम्ही रस्त्यावर उतरलो आहोत,” अशी भूमिका जेन नेक्स्टच्या आंदोलकांनी मांडली.