महाराष्ट्रात 8.57 लाख कोटींची गुंतवणूक; 2.91 लाख रोजगारांच्या संधी
मुंबई : महाराष्ट्राला देशासह जागतिक स्तरावर गुंतवणुकीचे प्रमुख केंद्र बनवण्याच्या उद्देशाने ‘इन्व्हेस्ट महाराष्ट्र’ या नव्या उपक्रमाची सुरुवात करण्यात आली आहे. गुंतवणूकदारांना जमीन, वीज, पायाभूत सुविधा, विविध परवानग्या आणि कुशल मनुष्यबळ उपलब्ध करून देण्यासाठी शासनाच्या विविध विभागांमध्ये समन्वय साधला जाणार आहे. प्रकल्प सुरू झाल्यानंतर त्याला आवश्यक ते सहकार्य देण्याची जबाबदारी शासनाची असेल, असे मुख्यमंत्री देवेंद्र फडणवीस यांनी सांगितले.
‘इन्व्हेस्ट महाराष्ट्र’च्या शुभारंभ कार्यक्रमात मुख्यमंत्री फडणवीस बोलत होते. यावेळी उपमुख्यमंत्री सुनेत्रा अजित पवार, उद्योगमंत्री उदय सामंत यांच्यासह विविध मंत्री, वरिष्ठ अधिकारी, उद्योजक आणि गुंतवणूकदार उपस्थित होते.
या उपक्रमांतर्गत 67 प्रस्तावित सामंजस्य करार करण्यात येणार असून, त्यातून 8.5 लाख कोटी रुपयांपेक्षा जास्त गुंतवणूक होण्याची शक्यता आहे. तसेच 3 लाखांहून अधिक प्रत्यक्ष आणि अप्रत्यक्ष रोजगाराच्या संधी निर्माण होण्याची अपेक्षा आहे. डेटा सेंटर, सेमीकंडक्टर, अक्षय ऊर्जा, उत्पादन, एरोस्पेस, संरक्षण, आरोग्यसेवा आणि कृषीप्रक्रिया अशा विविध क्षेत्रांचा या प्रस्तावांमध्ये समावेश आहे.
या गुंतवणुकीचा फायदा केवळ मोठ्या कंपन्यांपुरता मर्यादित न राहता स्थानिक लघु आणि मध्यम उद्योग, पुरवठादार, युवक तसेच शेतकऱ्यांना मिळावा, यावरही मुख्यमंत्र्यांनी भर दिला. मोठ्या उद्योगांनी स्थानिक कंपन्यांना आपल्या पुरवठा साखळीत संधी देण्याचे आवाहन त्यांनी केले.
चंद्रपूर, वर्धा, नागपूर, गोंदिया, नाशिक, जळगाव, धुळे, छत्रपती संभाजीनगर, जालना, पुणे, अहिल्यानगर, रत्नागिरी, पालघर आणि मुंबई महानगर प्रदेशात गुंतवणुकीचे प्रस्ताव आहेत. त्यामुळे राज्याच्या विविध भागांत रोजगार आणि विकासाच्या संधी निर्माण करण्याचा सरकारचा प्रयत्न आहे.
2030 पर्यंत महाराष्ट्राची अर्थव्यवस्था 1 ट्रिलियन डॉलरपर्यंत नेण्याचे उद्दिष्ट असून, त्यासाठी उद्योग, कौशल्य, संशोधन आणि तंत्रज्ञान क्षेत्राला चालना देण्यावर भर दिला जाणार आहे.