Navratri Festival : नवरात्रोत्सवाची आतुरतेने वाट पाहणाऱ्या भाविकांसाठी यंदाचं नवरात्र विशेष ठरणार आहे. देवीच्या नऊ रूपांची आराधना, घटस्थापना, उपवास आणि विविध धार्मिक विधींनी साजऱ्या होणाऱ्या शारदीय नवरात्रोत्सवाला ११ ऑक्टोबर २०२६ पासून सुरुवात होणार आहे. यंदाच्या नवरात्रीतील विशेष बाब म्हणजे अष्टमी आणि नवमी तिथी एकाच दिवशी येणार आहेत. त्यामुळे अष्टमी आणि नवमीच्या पूजा-विधींच्या वेळेबाबत भाविकांमध्ये उत्सुकता आहे.
११ ऑक्टोबरला घटस्थापनेने नवरात्रीला सुरुवात
हिंदू पंचांगानुसार, रविवार, ११ ऑक्टोबर २०२६ रोजी प्रतिपदा तिथीपासून शारदीय नवरात्रोत्सवाला सुरुवात होणार आहे. या दिवशी घटस्थापना करून देवीची पूजा केली जाईल. यानंतर नऊ दिवस देवीच्या विविध रूपांची भक्तिभावाने आराधना केली जाईल. या काळात अनेक भाविक उपवास, पूजा, आरती तसेच विविध धार्मिक विधी करतात. यानंतर २० ऑक्टोबर २०२६ रोजी विजयादशमी अर्थात दसरा साजरा केला जाईल आणि नवरात्रोत्सवाची सांगता होईल.
अष्टमी आणि नवमी एकाच दिवशी ?
यंदाच्या नवरात्रोत्सवातील महत्त्वाची बाब म्हणजे अष्टमी आणि नवमी तिथींचा योग एकाच दिवशी येत आहे. पंचांगानुसार, अष्टमी तिथी १८ ऑक्टोबर रोजी सकाळी सुमारे ८.२७ वाजता सुरू होऊन १९ ऑक्टोबर रोजी सकाळी सुमारे १०.५१ वाजेपर्यंत राहणार आहे. त्यानंतर नवमी तिथी सुरू होईल. त्यामुळे १९ ऑक्टोबर रोजी सूर्योदयाच्या वेळी अष्टमी तिथी असेल. परिणामी अष्टमीशी संबंधित पूजा-विधी या दिवशी केले जातील. त्यानंतर नवमी तिथी सुरू झाल्यामुळे महानवमीशी संबंधित विधीही याच दिवशी येणार आहेत.
Navratri 9 Days Colours 2026: शारदीय नवरात्रौत्सवाला यंदा ११ ऑक्टोबर २०२६ पासून सुरुवात होणार आहे. नवरात्रीच्या नऊ दिवसांमध्ये देवीच्या नऊ रूपांची भक्तिभावाने पूजा ...
१९ ऑक्टोबर ठरणार विशेष
यंदाच्या नवरात्रीमध्ये १९ ऑक्टोबर हा महत्त्वाचा दिवस ठरणार आहे. या दिवशी दुर्गा अष्टमीशी संबंधित पूजा, महागौरीची आराधना आणि कन्या पूजन केले जाऊ शकते. अष्टमी तिथी संपल्यानंतर नवमी सुरू होत असल्याने महानवमीशी संबंधित धार्मिक विधीही याच दिवशी केले जाण्याची शक्यता आहे. त्यामुळे अष्टमी आणि नवमीच्या पूजा करणाऱ्या भाविकांनी स्थानिक पंचांगानुसार तिथी आणि पूजा-विधींच्या वेळा तपासणे महत्त्वाचे ठरणार आहे.
देवीच्या नऊ रूपांची केली जाते आराधना
नवरात्रोत्सवात देवी दुर्गेच्या नऊ रूपांची पूजा करण्याची परंपरा आहे. प्रत्येक दिवशी देवीच्या एका रूपाची विशेष आराधना केली जाते. शैलपुत्रीपासून सिद्धिदात्रीपर्यंत देवीच्या विविध रूपांची भक्तिभावाने पूजा केली जाते. नवरात्रीच्या काळात भाविक उपवास, आरती, जप आणि विविध धार्मिक विधी करतात.
अनेक मंदिरांमध्ये या काळात विशेष पूजा आणि धार्मिक कार्यक्रमांचे आयोजन केले जाते. तसेच घराघरांत घटस्थापना करून देवीची भक्तिभावाने आराधना केली जाते.
यंदाच्या नवरात्रीतील महत्त्वाच्या तारखा
- ११ ऑक्टोबर २०२६ - घटस्थापना आणि नवरात्रोत्सवाची सुरुवात
- १८ ऑक्टोबर २०२६ - अष्टमी तिथीला सुरुवात
- १९ ऑक्टोबर २०२६ - अष्टमी आणि नवमी तिथीचा योग
- २० ऑक्टोबर २०२६ - विजयादशमी अर्थात दसरा
टीप : तिथी आणि पूजा-विधींच्या अचूक वेळांमध्ये पंचांगानुसार किंवा स्थानानुसार फरक असू शकतो. त्यामुळे धार्मिक विधी करण्यापूर्वी स्थानिक पंचांगातील वेळ तपासणे योग्य ठरेल.