हवेत तब्बल 30 हजार फूट उंचीवर फ्लायदुबईच्या विमानात घडलेल्या धक्कादायक घटनेत भारतीय वैमानिक कॅप्टन स्मित मच्छर यांनी प्रसंगावधान दाखवत मोठा धोका टाळला. विमान इस्रायलच्या दिशेने जात असताना सहवैमानिकाने कॉकपिटमध्ये त्यांच्यावर हल्ला केला. या घटनेत मच्छर जखमी झाले असून सध्या संयुक्त अरब अमिरातीमधील रुग्णालयात त्यांच्यावर उपचार सुरू आहेत.
इस्रायलचे पंतप्रधान बेंजामिन नेतान्याहू यांनी शनिवारी कॅप्टन मच्छर यांच्याशी फोनवर संवाद साधला. यावेळी मच्छर यांनी कॉकपिटमध्ये नेमके काय घडले, याची माहिती दिली. त्यांनी सांगितले की, सहवैमानिकाने प्रार्थना करण्यासाठी वेळ मागितला होता. त्यामुळे आदरापोटी ते काही वेळ समोरच्या बाजूला पाहत होते.
काही मिनिटांनंतर त्यांच्या डोक्याच्या मागील बाजूला अचानक जोरदार प्रहार झाला. त्यानंतर सलग हल्ले होत राहिले. सुरुवातीला विमानाचे काही नुकसान झाले असावे, असे त्यांना वाटले. मात्र काही वेळातच हल्ला सहवैमानिकाकडून होत असल्याचे त्यांच्या लक्षात आले.
मुंबई : मुंबई-अहमदाबाद बुलेट ट्रेन प्रकल्पाने आणखी एक महत्त्वाचा टप्पा गाठला आहे. अहमदाबादमधील साबरमती नदीवर बुलेट ट्रेनसाठी उभारण्यात येत असलेल्या ...
या हल्ल्यामुळे मच्छर यांच्या दृष्टीवर परिणाम झाला आणि त्यांना सर्व काही धूसर दिसू लागले. तरीही त्यांनी सहवैमानिकाला रोखण्याचा प्रयत्न केला. त्यावेळी विमान खाली कोसळत असल्याची भीती त्यांच्या मनात निर्माण झाली होती.
मच्छर यांनी सांगितले की, त्यांच्यात शेवटपर्यंत लढण्याची ताकद होती. त्यांनी कॉकपिटचा दरवाजा उघडण्याचा प्रयत्न केला आणि अखेर बाहेर जाण्यात यश मिळाले. त्यावेळी विमानातील प्रवाशांच्या किंकाळ्या त्यांना ऐकू येत होत्या.
नेतान्याहू यांनी सध्या संयुक्त अरब अमिरातीमधील रुग्णालयात उपचार घेत असलेल्या कॅप्टन स्मित मच्छर यांच्याशी संवाद साधला. यावेळी त्यांनी पंतप्रधान नरेंद्र मोदी आणि भारतीय वैमानिक स्मित मच्छर यांना इस्रायलच्या स्वातंत्र्यदिनी ज्योत प्रज्वलित करण्यासाठी आमंत्रित केले. मच्छर यांच्या धाडसाची दखल घेत नेतान्याहू यांनी त्यांचे कौतुक केले.
दरम्यान, संयुक्त अरब अमिरातीच्या तपासकर्त्यांनी या घटनेबाबत गंभीर माहिती दिली आहे. सहवैमानिकाने कथितरित्या दहशतवादी कृत्य करण्याचा प्रयत्न केला आणि कॉकपिटमध्ये असलेल्या आपत्कालीन कुऱ्हाडीने कॅप्टनवर हल्ला करून विमानाचा ताबा घेण्याचा प्रयत्न केल्याचे तपासात समोर आले आहे. हल्ल्यामागील नेमके कारण अद्याप स्पष्ट करण्यात आलेले नाही.
या घटनेनंतर सहवैमानिकाला पोलिसांनी ताब्यात घेतले आहे. कॅप्टन स्मित मच्छर यांच्या धाडसामुळे मोठी दुर्घटना टळल्याचे सांगितले जात आहे.