पुणे : हिंजवडी आयटी पार्कला पुणे शहराशी जोडणाऱ्या हिंजवडी-शिवाजीनगर मेट्रो मार्गिकेबाबत महत्त्वाची अपडेट समोर आली आहे. या मार्गावरील एकूण 23 पैकी 17 स्थानकांना रेल्वे सुरक्षा आयुक्तांकडून (CMRS) सुरक्षा मंजुरी मिळाल्याची माहिती आहे. त्यामुळे या स्थानकांवर प्रवासी सेवा सुरू करण्याच्या दृष्टीने महत्त्वाचा टप्पा पार झाला आहे. दरम्यान, येत्या 3 नोव्हेंबर रोजी पंतप्रधान नरेंद्र मोदी (PM Narendra Modi) यांच्या हस्ते मेट्रोचे उद्घाटन होण्याची शक्यता वर्तवली जात आहे. मात्र, उद्घाटनाची अधिकृत तारीख आणि प्रवासी सेवा सुरू होण्याबाबत अंतिम घोषणा होणे बाकी आहे.
आणखी 5 स्थानकांना सुरक्षा मंजुरी
हिंजवडी ते शिवाजीनगर हा मेट्रो मार्ग सुमारे 23.2 किलोमीटर लांबीचा असून, या मार्गावर एकूण 23 स्थानके आहेत. यापूर्वी माण ते आर. के. लक्ष्मण म्युझियम या पहिल्या टप्प्यातील 12 स्थानकांना सुरक्षा मंजुरी मिळाल्याचे सांगण्यात आले होते. आता आणखी 5 स्थानकांची सुरक्षा तपासणी पूर्ण झाल्याने मंजूर स्थानकांची संख्या 17 वर पोहोचली आहे.
मुंबई (विशेष प्रतिनिधी) समुद्राच्या पाण्याची गुणवत्ता सुधारण्याच्या दृष्टीने मुंबई मलनि:सारण प्रकल्पांतर्गत घाटकोपर (पूर्व) येथे उभारण्यात येत ...
सुरक्षा तपासणीदरम्यान सुचवण्यात आलेल्या तांत्रिक बाबींची पूर्तता करण्याचे काम संबंधित यंत्रणांकडून सुरू आहे. उर्वरित 6 स्थानकांसाठीही मंजुरी मिळवण्याची प्रक्रिया सुरू असल्याची माहिती आहे.
पुणेकरांना वाहतूक कोंडीतून दिलासा मिळणार?
हिंजवडी आयटी पार्क, बालेवाडी, औंध, पुणे विद्यापीठ परिसर आणि शिवाजीनगर यांसारख्या महत्त्वाच्या भागांना ही मेट्रो जोडणार आहे. सध्या या मार्गावर दररोज प्रवास करणाऱ्या आयटी कर्मचाऱ्यांना आणि इतर प्रवाशांना मोठ्या वाहतूक कोंडीचा सामना करावा लागतो. मेट्रो सेवा सुरू झाल्यानंतर रस्त्यावरील प्रवासाचा ताण कमी होण्यास मदत होण्याची अपेक्षा आहे.
सुरुवातीला 17 स्थानकांवर मेट्रो धावणार?
एकूण 23 पैकी 17 स्थानकांना सुरक्षा मंजुरी मिळाल्याने सुरुवातीला याच स्थानकांदरम्यान प्रवासी सेवा सुरू केली जाणार का, याबाबत उत्सुकता आहे. उर्वरित स्थानकांची मंजुरी आणि तांत्रिक कामे पूर्ण झाल्यानंतर संपूर्ण मार्गिका सुरू करण्याबाबत निर्णय होऊ शकतो.
दरम्यान, 3 नोव्हेंबर रोजी उद्घाटन होण्याची शक्यता व्यक्त केली जात असली, तरी प्रवासी सेवा सुरू होण्याची तारीख, मेट्रोचे वेळापत्रक आणि सुरुवातीचा कार्यान्वित मार्ग याबाबत अधिकृत घोषणेची प्रतीक्षा आहे. त्यामुळे पुणेकरांचे लक्ष आता पीएमआरडीए आणि संबंधित मेट्रो प्रशासनाच्या पुढील निर्णयाकडे लागले आहे.
