शांघाय (चीन) : रॉजर फेडररच्या कारकिर्दीतील सर्वाधिक 'एटीपी' (ATP) विजेतेपदांच्या विक्रमाशी बरोबरी करण्याच्या दिशेने आगेकूच करणाऱ्या टेनिस जगतातील दिग्गज नोव्हाक जोकोविचला शांघाय मास्टर्स स्पर्धेत मोठा पराभवाचा धक्का बसला आहे. स्पर्धेच्या दुसऱ्या फेरीत पोलंडच्या ह्युबर्ट हुरकाझ याने जोकोविचचा 4-6, 3-6 असा सरळ सेटमध्ये पराभव करत त्याला स्पर्धेतून बाहेरचा रस्ता दाखवला.
बीजिंगमधील विजयानंतर स्वप्न भंग
काही दिवसांपूर्वीच बीजिंगमधील 'चायना ओपन'मध्ये आपले 102 वे टूर-स्तरीय विजेतेपद जिंकून जोकोविच मोठ्या आत्मविश्वासाने शांघायमध्ये दाखल झाला होता. 24 वेळा ग्रँड स्लॅम विजेता असणाऱ्या 39 वर्षीय जोकोविचने मंगळवारीच बीजिंगच्या अंतिम सामन्यात ऑस्ट्रेलियाच्या ॲलेक्स डी मिनॉरचा पराभव केला होता. त्यामुळे तो फेडररच्या 103 'एटीपी' विजेतेपदांच्या विक्रमाच्या अगदी जवळ पोहोचला होता. मात्र, शांघायमधील या पराभवामुळे त्याचे हे स्वप्न तूर्तास लांबणीवर पडले आहे. यापूर्वी त्याने ही स्पर्धा चार वेळा जिंकली असल्याने यंदाही त्याच्याकडून मोठ्या अपेक्षा होत्या.
भारतीय क्रिकेट संघाचा अनुभवी अष्टपैलू खेळाडू रवींद्र जडेजा पुन्हा एकदा लाल चेंडूच्या (Red Ball) क्रिकेटमध्ये आपला जलक दाखवण्यासाठी सज्ज झाला आहे. रणजी ...
हुरकाझची भेदक खेळ आणि ऐतिहासिक विजय
दुसरीकडे, पोलंडच्या ह्युबर्ट हुरकाझने अप्रतिम कामगिरी करत जोकोविचविरुद्धच्या आपल्या मागील नऊ सामन्यांमधील पहिलाच ऐतिहासिक विजय नोंदवला. हा सामना अवघ्या 78 मिनिटांत संपला. हुरकाझने आपल्या पहिल्या सर्व्हिसवर तब्बल 82 टक्के गुण जिंकत संपूर्ण सामन्यात आपले वर्चस्व कायम ठेवले. सामन्याच्या सुरुवातीपासूनच जोकोविचवर प्रचंड दबाव होता. हुरकाझने तिसऱ्या गेममधील दोन महत्त्वाचे 'ब्रेक पॉइंट्स' वाचवून आपला जम बसवला. सर्बियन टेनिसपटू जोकोविचला प्रतिस्पर्ध्याच्या वेगवान सर्व्हिस आणि अचूक 'बेसलाइन' खेळाला सातत्यपूर्ण प्रत्युत्तर देण्यात अपयश आले आणि अखेर त्याला दोन्ही सेट गमवावे लागले. सामन्यानंतर बोलताना जोकोविचने हुरकाझच्या तुफान खेळाचा सामना करणे किती कठीण होते, हे प्रांजळपणे मान्य केले. बीजिंगमधील सुवर्णक्षण आणि शांघायमधील निराशाजनक कामगिरी यांमधील मोठी तफावत या पराभवामुळे स्पष्ट झाली आहे.
