पुणे : अपुऱ्या पावसामुळे धरणांमधील पाणीसाठ्याचे नियोजन करण्यासाठी पुणे महापालिकेने पाणीकपातीचा निर्णय घेतला आहे. त्यानुसार 15 ऑक्टोबरपासून दर गुरुवारी संपूर्ण दिवस शहरातील पाणीपुरवठा बंद ठेवण्यात येणार आहे. राज्य सरकारच्या जलसंपदा विभागाने स्थानिक स्वराज्य संस्थांना किमान 10 टक्के पाणीकपात करण्याच्या सूचना दिल्या आहेत. त्यानुसार महापालिकेने हा निर्णय घेतल्याची माहिती समोर आली आहे. त्यामुळे पुणेकरांना पाणी वापरताना अधिक काळजी घ्यावी लागणार आहे. (Pune Water Supply)
कमी पावसामुळे नागरिकांचे हाल
यंदा पावसाचे प्रमाण कमी राहिल्याने आगामी काळात पाण्याची गरज भागवण्याचे आव्हान निर्माण झाले आहे. पुणे शहराला खडकवासला, पानशेत, वरसगाव आणि टेमघर या 4 धरणांतून पाणीपुरवठा केला जातो. या धरणांमधील उपलब्ध पाणीसाठ्याचा आढावा घेतल्यानंतर आठवड्यातून एक दिवस पाणीपुरवठा बंद ठेवण्याचे नियोजन करण्यात आले आहे. पुढील पावसाळ्यापर्यंत शहराला पुरेसा पाणीपुरवठा करता यावा, हा या निर्णयामागील उद्देश आहे. (water supply)
महाराष्ट्रात सध्या उन्हाचा चटका वाढत असून, अनेक भागांत नागरिकांना उकाड्याचा सामना करावा लागत आहे. ऑक्टोबर हिटचा प्रभाव जाणवत असताना काही ...
पाणी जपून वापरा
प्रशासनाच्या माहितीनुसार, खडकवासला धरण साखळीत सध्या 26.22 टीएमसी पाणीसाठा उपलब्ध आहे. मागील वर्षाच्या तुलनेत हा साठा कमी असल्याने पाण्याचा वापर जपून करण्यावर भर दिला जात आहे. भविष्यातील परिस्थितीचा आढावा घेऊन गरज पडल्यास पाणीकपात वाढवण्याचाही विचार केला जाऊ शकतो.
पाण्याची बचत करण्यासाठी महापालिकेने काही निर्बंधही लागू केले आहेत. बांधकामांसाठी पिण्याच्या पाण्याचा वापर करण्यास मनाई करण्यात आली आहे. तसेच सार्वजनिक आणि खासगी वॉशिंग सेंटरमध्ये वाहने धुण्यासाठी, अंगण आणि पदपथ स्वच्छ करण्यासाठी पिण्याचे पाणी वापरता येणार नाही. जलतरण तलाव आणि उद्यानांसाठीही पिण्याच्या पाण्याचा वापर टाळण्याचे निर्देश देण्यात आले आहेत.
गृहनिर्माण संस्था, सोसायट्या आणि व्यापारी आस्थापनांनी पाणी बचतीसाठी उपाययोजना कराव्यात, असे आवाहन प्रशासनाने केले आहे. नळांची गळती तातडीने दुरुस्त करून पाण्याचा अपव्यय टाळण्याचेही सांगण्यात आले आहे. उपलब्ध पाणीसाठा दीर्घकाळ पुरावा यासाठी नागरिकांनीही पाण्याचा वापर काटकसरीने करणे आवश्यक आहे.
