प्रवाशांसाठी आनंदाची बातमी! धम्मचक्र प्रवर्तन दिनानिमित्त मध्य रेल्वे चालवणार 24 विशेष गाड्या; पाहा संपूर्ण वेळापत्रक

मुंबई : भारतीय इतिहासात 1956 मध्ये डॉ. बाबासाहेब आंबेडकर यांनी आपल्या लाखो अनुयायांसह बौद्ध धर्म स्वीकारलेला दिवस म्हणजेच 'धम्मचक्र प्रवर्तन दिन' अत्यंत श्रद्धा आणि उत्साहाने साजरा केला जातो. या ऐतिहासिक दिनानिमित्त नागपूरच्या दीक्षाभूमीवर दरवर्षी देशभरातून करोडो अनुयायी अभिवादन करण्यासाठी दाखल होतात. या काळात अनुयायांना कोणतीही गैरसोय होऊ नये आणि प्रवास सुकर व्हावा, म्हणून मध्य रेल्वे प्रशासनाने मोठा निर्णय घेतला आहे. रेल्वेने नागपूरसाठी 24 विशेष गाड्या चालवण्याची घोषणा केली आहे.

प्रमुख वैशिष्ट्ये आणि गाड्यांचे मार्ग

प्रवाशांच्या वाढत्या गर्दीला लक्षात घेता मध्य रेल्वेने मुंबई, पुणे, सोलापूर, नाशिक, अकोला आणि भुसावळ येथून नागपूरसाठी विशेष गाड्यांचे नियोजन केले आहे. यामध्ये प्रामुख्याने आरक्षित आणि अनारक्षित अशा दोन्ही प्रकारच्या गाड्यांचा समावेश आहे:

• 1. नागपूर - अकोला - नागपूर विशेष गाड्या (4 फेऱ्या): या गाड्या 20, 21 आणि 22 ऑक्टोबर 2026 दरम्यान धावतील. यामध्ये वातानुकूलित आणि शयनयान (स्लीपर) श्रेणीची सोय उपलब्ध असून, याचे आरक्षण IRCTC संकेतस्थळावर किंवा संगणकीकृत केंद्रांवर करता येईल.

• 2. मुंबई (छत्रपती शिवाजी महाराज टर्मिनस) - नागपूर अनारक्षित विशेष गाड्या (6 फेऱ्या): मुंबईतून नागपूरसाठी 18, 19 आणि 21 ऑक्टोबरला विशेष गाड्या सुटणार आहेत. प्रवाशांच्या सोयीसाठी दादर, ठाणे, कल्याण, इगतपुरी, नाशिक रोड ते भुसावळमार्गे या गाड्या धावतील.

• 3. पुणे – नागपूर - पुणे अनारक्षित विशेष गाड्या (4 फेऱ्या): पुण्याहून 19 आणि 21 ऑक्टोबरला गाडी सुटून नागपूरला पोहोचेल, तर परतीची गाडी नागपूरहून 20 आणि 22 ऑक्टोबरला सुटणार आहे.

• 4. सोलापूर - नागपूर - सोलापूर अनारक्षित विशेष गाडी (2 फेऱ्या): सोलापूरहून 19 ऑक्टोबरला सुटणारी ही विशेष गाडी कुर्डुवाडी, दौंड, अहिल्यानगर मार्गे नागपूरला जाईल.

• 5. नागपूर - भुसावळ - नागपूर अनारक्षित विशेष गाड्या (4 फेऱ्या): 20 आणि 21ऑक्टोबरला ही विशेष सेवा उपलब्ध असणार आहे.

• 6. नाशिक रोड - नागपूर - नाशिक रोड मेमू अनारक्षित विशेष गाड्या (4 फेऱ्या): 18 ते 21 ऑक्टोबर दरम्यान नाशिकहून सुटणाऱ्या या मेमू विशेष गाड्यांचा लाभ परिसरातील प्रवाशांना घेता येईल.

सांताक्रूझ स्कायवॉकला छत बसवण्याचा प्रस्ताव अद्यापही रखडलेला, BMC स्थायी समितीच्या मंजुरीकडे लक्ष

मुंबई: सांताक्रूझ पूर्वेकडील स्टेशन लगत असणाऱ्या स्कायवॉकचं छत बसवण्यासाठी निविदा काढून अनेक महिने उलटले आहेत. इतके महिने उलटले तरीही सुद्धा ...

प्रवाशांसाठी महत्त्वाच्या सूचना

• तिकीट बुकिंग: अनारक्षित डब्यांचे तिकीट काढण्यासाठी प्रवासी सामान्य दरांसह 'युटीएस' (UTS) प्रणाली किंवा 'रेलवन' (RailOne) ॲपचा वापर करू शकतात.

• अतिरिक्त सोयी: नागपूरमधील अजनी व मुख्य रेल्वे स्थानकांवर प्रवाशांच्या गर्दीचे नियोजन करण्यासाठी अतिरिक्त तिकीट काऊंटर्स सुरू करण्यात आले आहेत.

• वेळापत्रक: आपल्या प्रवासाची अचूक वेळ आणि थांब्यांची सविस्तर माहिती मिळवण्यासाठी प्रवाशांनी www.enquiry.indianrail.gov.in या संकेतस्थळाला भेट द्यावी किंवा NTES ॲप डाऊनलोड करावे, असे आवाहन रेल्वे प्रशासनाकडून करण्यात आले आहे.