Nashik Crime : नाशिक शहरातील त्र्यंबकनाका सिग्नल परिसरात एका तरुणाला दगडाने मारहाण करून जीवे मारण्याचा प्रयत्न केल्याची घटना समोर आली आहे. १२ ऑक्टोबर २०२६ रोजी सायंकाळी सुमारे ७.१५ वाजण्याच्या सुमारास ही घटना घडली. यावेळी परिसरातून जात असलेल्या नाशिक शहर गुन्हे शाखेच्या गुंडाविरोधी पथकातील पोलिसांनी प्रसंगावधान राखत तातडीने हस्तक्षेप केला. मारहाण करणाऱ्या दोघांना ताब्यात घेतल्याने जखमी तरुणाचे प्राण वाचवण्यात मदत झाली.
पोलिसांच्या तत्परतेमुळे जखमी तरुणाला मदत
मिळालेल्या माहितीनुसार, त्र्यंबकनाका सिग्नल येथे दोन व्यक्ती एका तरुणावर दगडाने हल्ला करत असल्याचे गुंडाविरोधी पथकातील सहायक पोलीस उपनिरीक्षक सुनील आडके आणि पोलीस अंमलदार गुरु गांगुर्डे यांच्या निदर्शनास आले. घटनेचे गांभीर्य ओळखून त्यांनी तातडीने घटनास्थळी थांबत हस्तक्षेप केला. यावेळी उपस्थित वाहतूक पोलीस कर्मचारी सहायक पोलीस उपनिरीक्षक गांगुर्डे आणि पोलीस हवालदार चव्हाण यांच्या मदतीने मारहाण करणाऱ्या दोघांना ताब्यात घेण्यात आले. जखमी तरुणाला तातडीने उपचारासाठी नाशिकच्या जिल्हा शासकीय रुग्णालयात पाठवण्यात आले.
रिक्षात प्रवासी भरण्यावरून वाद
पोलिसांनी ताब्यात घेतलेल्या संशयितांची नावे पवन गोविंदा पाटील (वय २५) आणि राहुल लहु सोनवणे (वय २५) अशी आहेत. पोलिसांनी दिलेल्या माहितीनुसार, जखमी तरुणाचे नाव प्रेम हिरे असून, रिक्षात प्रवासी भरण्यावरून त्याचा आणि त्याच्या मित्रांचा पवन पाटील व अरुण कांबळे यांच्यासोबत वाद झाला होता. याच वादातून पवन पाटील, राहुल सोनवणे, जगदीश गायकवाड आणि अरुण कांबळे यांनी प्रेम हिरे व त्याच्या मित्रांना मारहाण केल्याची माहिती समोर आली आहे.
Nashik Crime : नाशिक शहरातील उपनगर पोलीस ठाण्याच्या हद्दीत असलेल्या समतानगर आणि राहुल नगर परिसरात मारहाणीची गंभीर घटना समोर आली आहे. जमावाने केलेल्या ...
मुंबई नाका पोलीस ठाण्यात गुन्हा दाखल
या प्रकरणी फिर्यादी दीपक संजय पाटील यांच्या तक्रारीवरून मुंबई नाका पोलीस ठाण्यात गुन्हा रजिस्टर क्रमांक ४६४/२०२६ नुसार भारतीय न्याय संहिता कलम १०९(१), ४६, ३(५), तसेच भारतीय हत्यार कायदा कलम ४/२५ आणि महाराष्ट्र पोलीस कायदा कलम १३५ अन्वये गुन्हा दाखल करण्यात आला आहे. या प्रकरणाचा पुढील तपास मुंबई नाका पोलीस करत आहेत. घटनेत सहभागी असलेल्या अन्य व्यक्तींबाबत आणि मारहाणीच्या नेमक्या घटनाक्रमाबाबत पोलीस तपास सुरू आहे.
गुंडाविरोधी पथकाची कामगिरी
पोलीस आयुक्त संदीप कर्णिक, पोलीस उपआयुक्त (गुन्हे) किरणकुमार चव्हाण आणि सहायक पोलीस आयुक्त (गुन्हे) संदीप मिटके यांच्या मार्गदर्शनाखाली ही कारवाई करण्यात आली. गुंडाविरोधी पथकाचे प्रभारी अधिकारी पोलीस उपनिरीक्षक संदीप पवार यांच्या नेतृत्वाखाली सहायक पोलीस उपनिरीक्षक सुनील आडके आणि पथकातील इतर पोलीस अधिकारी व कर्मचाऱ्यांनी या कारवाईत सहभाग घेतला. त्र्यंबकनाका सिग्नलवरील या घटनेत पोलिसांनी वेळीच हस्तक्षेप केल्यामुळे जखमी तरुणाला तातडीने वैद्यकीय मदत मिळाली. शहरातील कायदा व सुव्यवस्था राखण्यासाठी पोलिसांची तत्परता या कारवाईतून अधोरेखित झाली आहे.