Murasu Cyclone : ‘अर्नब’ चक्रीवादळा'नंतर आता मुरासू चक्रीवादळाचा धोका निर्माण झाला आहे. नैऋत्य बंगालच्या उपसागरावर असलेले 'मुरासू' (Murasu) हे चक्रीवादळ गेल्या ६ तासांत ताशी सुमारे २० किमी वेगाने वायव्य दिशेकडे सरकले आहे. हे वादळ अधिक तीव्र होऊन आता 'तीव्र चक्रीवादळ' (severe cyclonic storm) बनले आहे. सोमवारी (२ नोव्हेंबर) पहाटे २:३० वाजताच्या सुमारास, हे चक्रीवादळ त्याच भागात, ईशान्य दिशेला केंद्रित होते.
हे ठिकाण चेन्नई (तमिळनाडू) पासून ईशान्य-पूर्वेकडे सुमारे २६० किमी, नेल्लोर (आंध्र प्रदेश) पासून आग्नेय-पूर्वेकडे २९० किमी, मछलीपट्टणम (आंध्र प्रदेश) पासून आग्नेय-दक्षिणेकडे ३२० किमी, कावली (आंध्र प्रदेश) पासून आग्नेय-पूर्वेकडे ३१० किमी, ओंगोले (आंध्र प्रदेश) पासून आग्नेय-दक्षिणेकडे ३३० किमी आणि विशाखापट्टणम (आंध्र प्रदेश) पासून दक्षिणेकडे ४७० किमी अंतरावर स्थित आहे.
मुरासू दक्षिण आंध्र प्रदेशच्या किनारपट्टीवरून जाईल
हे वादळ वायव्य दिशेने पुढे जाणे अपेक्षित असून, २ नोव्हेंबर २०२६ रोजी मध्यरात्री (२३:३०) ते ३ नोव्हेंबर २०२६ रोजी पहाटे (०४:००) या दरम्यान ओंगोल परिसराजवळ पोहोचण्याची शक्यता आहे. ओंगोल ओलांडल्यानंतर, हे वादळ नेल्लोर आणि नरसापूर दरम्यान दक्षिण आंध्र प्रदेश किनारपट्टी ओलांडण्याची शक्यता आहे. या काळात वाऱ्याचा वेग ताशी १०० ते ११५ किमी इतका असेल आणि वाऱ्याचे झोत ताशी १२० किमीपर्यंत पोहोचू शकतात.
Cyclone Murasu : ‘अर्नब’ चक्रीवादळा'नंतर आता मुरासू चक्रीवादळाचा धोका निर्माण झाला आहे. बंगालच्या उपसागरात पुन्हा एकदा चक्रीवादळाचे संकट निर्माण झाले आहे. ...
चेन्नईतील सर्व शाळांना सुट्टी जाहीर
चक्रीवादळाच्या पार्श्वभूमीवर चेन्नईतील सर्व शाळांना सोमवारसाठी सुट्टी जाहीर करण्यात आली आहे. आंध्र प्रदेशच्या किनारपट्टीवरील भागांसह रायलसीमा परिसरात २ आणि ३ नोव्हेंबर रोजी मुसळधार ते अतिमुसळधार पावसाचा अंदाज वर्तवण्यात आला आहे. काही ठिकाणी अत्यंत मुसळधार पाऊस पडण्याची शक्यताही व्यक्त करण्यात आली आहे. तसेच उत्तर तमिळनाडूच्या काही भागांत मध्यम स्वरूपाचा पाऊस होऊ शकतो.
झाडे कोसळण्यासह पूरस्थितीचा धोका
मुरासू चक्रीवादळामुळे सोसाट्याचे वारे वाहण्याची शक्यता असून, त्यामुळे झाडे उन्मळून पडणे, विजेच्या तारा तुटणे आणि सखल भागांत पाणी साचून पूरस्थिती निर्माण होण्याचा धोका आहे. मच्छीमारांना समुद्रात न जाण्याचा इशारा देण्यात आला आहे. संभाव्य परिस्थितीचा सामना करण्यासाठी स्थानिक प्रशासनाने बचावकार्याची तयारी सुरू केली आहे.
