पश्चिम रेल्वेने मुंबईतील वाढती प्रवासी गर्दी आणि लांब पल्ल्याच्या गाड्यांमधील वेटिंग लिस्टची समस्या दूर करण्यासाठी एका मोठ्या प्रकल्पाची आखणी केली आहे. या योजनेअंतर्गत मुंबईतून सुटणाऱ्या एक्स्प्रेस गाड्यांची संख्या टप्प्याटप्प्याने वाढवण्यात येणार असून, प्रवाशांचा प्रवास अधिक सुखकर करण्याचा प्रयत्न केला जात आहे. केंद्रीय रेल्वेमंत्री अश्विनी वैष्णव यांच्या सूचनेनुसार पश्चिम रेल्वेने विविध स्थानकांवरून 100 नवीन गाड्या चालवण्याची व्यापक योजना तयार केली आहे. पहिल्या टप्प्यात 17 अतिरिक्त गाड्या सुरू करण्याचे नियोजन आहे. यात दादर स्थानकातून 5 आणि जोगेश्वरी टर्मिनसवरून 12 नवीन गाड्या धावणार आहेत. नवीन वर्षाच्या सुरुवातीला या गाड्या रुळावर आणण्याचे उद्दिष्ट ठेवण्यात आले आहे.
दादर येथे 25 डब्यांच्या गाड्यांसाठी योग्य असलेला नवीन फलाट आणि रेल्वे मार्ग तयार करण्याचे काम वेगाने सुरू आहे. हे काम डिसेंबर 2026 पर्यंत पूर्ण होणे अपेक्षित आहे. तसेच, दादर येथे प्रवास संपणाऱ्या गाड्यांच्या देखभालीसाठी मध्य रेल्वेच्या करी रोड येथील जागेवर विशेष कोचिंग डेपो उभारला जाणार आहे. दुसरीकडे, जोगेश्वरी रेल्वे टर्मिनसचे काम आता अंतिम टप्प्यात पोहोचले आहे. सुमारे 76.48 कोटी रुपये खर्चून तयार होत असलेल्या या टर्मिनसवर गाड्यांच्या मोकळ्या पार्किंगची आणि प्राथमिक स्वच्छतेची स्वतंत्र व्यवस्था उपलब्ध असेल. येथून 12 गाड्या चालवण्याचे नियोजन असून, हे कामही डिसेंबर 2026 पर्यंत पूर्ण होईल.
मुंबई : मुंबईतील सार्वजनिक वाहतूक व्यवस्था अधिक बळकट आणि प्रवाशांसाठी सोयीस्कर करण्यासाठी बृहन्मुंबई विद्युत पुरवठा आणि परिवहन उपक्रमाने (BEST) एक मोठा ...
लोकल ट्रेन आणि लांब पल्ल्याच्या एक्स्प्रेस गाड्या एकाच मार्गावर आल्यामुळे निर्माण होणारा अडथळा टाळण्यासाठी वसई येथे नवीन कोचिंग टर्मिनस उभारले जात आहे. या 150 कोटी रुपयांच्या प्रकल्पामुळे उपनगरीय आणि मेल-एक्स्प्रेस वाहतूक एकमेकांपासून वेगळी होईल. वसई टर्मिनसवरून पहिल्या टप्प्यात 12 आणि दुसऱ्या टप्प्यात 3 अशा एकूण 15 नवीन गाड्या सुरू केल्या जातील. पहिल्या टप्प्यातील काम डिसेंबर 2027 पर्यंत पूर्ण करण्याचे लक्ष्य आहे. यामुळे वसई आणि दादर-जोगेश्वरी मिळून एकूण 32 नवीन गाड्यांची भर पडणार आहे.
मुंबई सेंट्रल स्थानकातील फलाटांचा विस्तार
मुंबई सेंट्रल स्थानकातून सध्या तरी कोणतीही नवीन गाडी सुरू केली जाणार नाही; मात्र सध्या उपलब्ध असलेल्या गाड्यांची क्षमता वाढवण्यावर भर दिला जात आहे. यासाठी स्थानकातील फलाटांची लांबी वाढवण्याचा प्रकल्प हाती घेण्यात आला आहे. सध्या येथील पाच फलाट 15 ते 21 डब्यांच्या गाड्यांसाठीच सक्षम आहेत. आता हे सर्व फलाट 24 डब्यांच्या एक्स्प्रेस गाड्या उभ्या राहू शकतील अशा प्रकारे मोठे केले जातील. 342 कोटी रुपयांच्या या प्रकल्पाचे काम सप्टेंबर 2028 पर्यंत पूर्ण करण्याचे नियोजन आहे.
एकंदरीत, या सर्व पायाभूत सुविधा आणि नवीन टर्मिनसमुळे मुंबईतील रेल्वे प्रवाशांना येत्या काळात मोठा दिलासा मिळणार आहे.