सोशल मीडियावर रील्स, शॉर्ट्स आणि व्हिडिओ तयार करणाऱ्या कंटेंट क्रिएटर्ससाठी एक महत्त्वाची बातमी आहे. कारण आता तुमच्या सोशल मीडिया क्रिएटिव्हिटीला आर्थिक मोबदला मिळण्याची संधी उपलब्ध होणार आहे. महाराष्ट्र शासनाकडून सोशल मीडिया इन्फ्लुएन्सर्सना सरकारच्या विविध योजना आणि उपक्रमांची माहिती लोकांपर्यंत पोहोचवण्यासाठी सहभागी करून घेतले जाणार आहे. या माध्यमातून पात्र क्रिएटर्सना एक लाख रुपयांपर्यंत मानधन किंवा बक्षीस मिळू शकते.
असा कराल अर्ज
- अधिकार आणि निविदा: महाराष्ट्र शासनाच्या माहिती व जनसंपर्क महासंचालनालयामार्फत यासाठी इन्फ्लुएन्सर्सचे 'इम्पेनेलमार्क' आणि डिजिटल कॅम्पेन राबवले जाते. यासाठी अधिकृत जाहिरात प्रसिद्ध झाल्यानंतर इच्छुक क्रिएटर्सना अर्ज करता येतो.
- पात्रता आणि अर्ज: अर्जासोबत स्वतःचे सोशल मीडिया प्रोफाइल, फॉलोअर्सची संख्या, तसेच यापूर्वी तयार केलेल्या व्हिडिओंचे व्ह्यूज आणि एंगेजमेंट रिपोर्ट सादर करावे लागतात.
View this post on Instagram
- प्रोफाईल पडताळणी: प्राप्त अर्जांची शासनाच्या निर्धारित निकषांनुसार छाननी केली जाते. शासनाच्या निकषांनुसार (उदा. किमान फॉलोअर्स आणि रीच) तुमच्या पेजची पात्रता तपासली जाते आणि निवड केली जाते.
- व्हिडिओ बनवणे: पात्र ठरलेल्या आणि निवड झालेल्या क्रिएटर्सना शासनाच्या विविध योजना आणि उपक्रमांची माहिती दिली जाते. त्यानंतर या विषयांवर स्वतःच्या कल्पक शैलीत आकर्षक व्हिडिओ किंवा रील्स तयार करून सोशल मीडियावर प्रसिद्ध करावे लागतात.
- मानधन : रील अपलोड केल्यानंतर व्ह्यूज, इम्प्रेशनन्स आणि ठरलेल्या दरांनुसार (एका व्हिडिओमागे ₹१,००,००० पर्यंत) सरकारकडून थेट तुमच्या खात्यात मानधन जमा होते.
त्यामुळे सोशल मीडियावर कंटेंट तयार करणाऱ्या तरुणांसह डिजिटल क्रिएटर्सना आपल्या कौशल्याच्या माध्यमातून उत्पन्न मिळवण्याची संधी उपलब्ध होऊ शकते. मात्र, अर्ज करण्यापूर्वी शासनाची अधिकृत जाहिरात, पात्रतेचे निकष, मानधनाचे दर आणि अर्जाची अंतिम मुदत तपासणे आवश्यक आहे.
