Mumbai Crime News: मुंबईतील जुहू परिसरात लक्ष्मीपूजेच्या दिवशी फटाके फोडण्यावरून झालेल्या वादातून 19 वर्षीय तरुणाचा मृत्यू झाल्याची घटना समोर आली आहे. दुचाकीजवळ फटाके फोडण्यास विरोध केल्याने काही जणांनी तरुणाला मारहाण केल्याचा आरोप आहे. या प्रकरणी जुहू पोलिसांनी दोन जणांना अटक केली असून एका अल्पवयीन मुलाला ताब्यात घेतले आहे.
Mother Dairy: सर्वसामान्यांच्या खिशाला पुन्हा महागाईचा फटका बसणार आहे. मदर डेअरीने आपल्या दुधाच्या विविध प्रकारांच्या दरात प्रति लिटर 2 ते 4 रुपयांची वाढ ...
मृत तरुणाची ओळख पटली
मृत तरुणाचे नाव नानू उर्फ शुभंकर मुखिया असून तो जुहू परिसरातील रहिवासी होता. या प्रकरणात अटक करण्यात आलेल्या आरोपींची नावे राहुल संतोष मंडल (23) आणि रविकुमार सरवनन देवेंद्र (22) अशी आहेत. हे दोघेही विलेपार्ले पश्चिम येथील नेहरू नगर परिसरात राहणारे असल्याची माहिती आहे.
फटाक्यांवरून वाद, तरुणाला मारहाण
‘हिंदुस्तान टाइम्स’ने झोन 9 चे पोलीस उपायुक्त मोहित कुमार गर्ग यांच्या हवाल्याने दिलेल्या वृत्तानुसार, ही घटना जुहू येथील व्ही. एम. रोड परिसरात घडली. आरोपी रस्त्याच्या कडेला फटाके फोडत होते. यावेळी त्यांच्या पार्क केलेल्या दुचाकीजवळ फटाके फोडण्यास शुभंकरने आक्षेप घेतला.
त्याने वारंवार फटाके फोडण्यास विरोध केला. मात्र, त्याकडे दुर्लक्ष झाल्याने दोन्ही बाजूंमध्ये वाद झाला. या वादाचे पुढे हाणामारीत रूपांतर झाले. आरोपींनी शुभंकरला मारहाण केली. झटापटीदरम्यान त्याला जमिनीवर ढकलण्यात आले. खाली पडल्याने तो गंभीर जखमी झाला आणि त्याला मोठ्या प्रमाणात रक्तस्त्राव झाला.
कूपर रुग्णालयात मृत घोषित
स्थानिक रहिवाशांनी शुभंकरला तातडीने विलेपार्ले येथील कूपर रुग्णालयात दाखल केले. मात्र, डॉक्टरांनी त्याला मृत घोषित केले. या घटनेची माहिती मिळताच जुहू पोलीस घटनास्थळी दाखल झाले.
शुभंकरचा मित्र विवेक सिंग (21) याने दिलेल्या तक्रारीवरून पोलिसांनी हत्येचा गुन्हा दाखल केला. शुभंकर जमिनीवर कोसळल्यानंतर आरोपी वाहनातून घटनास्थळावरून पळून गेल्याचे त्याने तक्रारीत म्हटले आहे.
सीसीटीव्हीच्या मदतीने आरोपींची ओळख
पोलिसांनी परिसरातील सीसीटीव्ही फुटेज तपासून संशयितांची ओळख पटवली. त्यानंतर नेहरू नगर परिसरातून दोन प्रौढ आरोपींना अटक करण्यात आली, तर एका अल्पवयीन मुलाला ताब्यात घेण्यात आले आहे. या प्रकरणाचा पुढील तपास जुहू पोलीस करत आहेत.