मुंबईतील कुकची महिना 1.05 लाख कमाई, एमबीएवाल्यांनाही मागे टाकले

मुंबईत एका घरात स्वयंपाकाचे काम करणाऱ्या कुकची कहाणी सध्या सोशल मीडियावर मोठ्या प्रमाणात चर्चेत आहे. या कुकची महिन्याची कमाई तब्बल 1.05 लाख रुपयांपेक्षा जास्त असून त्याच्या घराची एकूण मासिक उत्पन्न दीड लाख रुपयांच्या जवळपास पोहोचले आहे. त्याची ही कहाणी लिंक्डइनवर शेअर करण्यात आली असून अनेकांनी त्यावर आपली मते मांडली आहेत. मिळालेल्या माहितीनुसार, हा कुक एकाच ठिकाणी काम न करता वेगवेगळ्या घरांमध्ये काम करतो. तो एका घरात दिवसातून दोन वेळा जेवण बनवण्यासाठी 18 हजार रुपये घेतो. त्याच इमारतीतील दुसऱ्या एका फ्लॅटमधून त्याला 16,500 रुपये मिळतात. तर जवळच राहणाऱ्या एका मोठ्या कुटुंबाकडे स्वयंपाक आणि स्वयंपाकघरातील इतर कामांसाठी त्याला 38 हजार रुपये मिळतात. याशिवाय तो शुक्रवारी रात्री चित्रपटाच्या शूटिंगमध्येही काम करतो. रात्रभर चालणाऱ्या शूटिंगदरम्यान तो संपूर्ण टीमसाठी जेवण बनवतो. त्यासाठी त्याला एका रात्रीचे सुमारे 7,500 रुपये मिळतात. अशा प्रकारे चार वेगवेगळ्या ठिकाणांहून त्याची एकूण मासिक कमाई सुमारे 1.05 लाख रुपये होते. त्याची पत्नीही काम करते आणि तिला महिना सुमारे 45 हजार रुपये मिळतात. त्यामुळे दोघांची एकत्रित घरगुती कमाई सुमारे दीड लाख रुपये होते. या पोस्टमध्ये एमबीए केलेल्या मित्रांशीही तुलना करण्यात आली आहे. एमबीए केलेले अनेक मित्र कागदावर जास्त पगार घेत असले तरी आयकर, ईएमआय, मुलांच्या शिक्षणाचा खर्च आणि इतर खर्च वजा केल्यानंतर हातात उरणारी रक्कम खूपच कमी असते. तर कुकच्या कमाईचा मोठा हिस्सा त्याच्याकडेच राहतो, असे म्हटले आहे. या कुकचे आणखी एक वैशिष्ट्य म्हणजे त्याची कमाई एकाच मालकावर अवलंबून नाही. तो सुमारे दोन किलोमीटरच्या परिसरात चार घरांमध्ये काम करतो. एखाद्या घरचे काम सुटले तरी त्याची संपूर्ण कमाई थांबत नाही. त्याच्या विश्वासार्ह कामामुळे त्याला सतत नवीन कामाच्या विचारणा येत असतात. लोक त्याच्या कामासाठी जास्त पैसे द्यायलाही तयार असतात. महागड्या जीवनशैलीपासूनही तो दूर आहे. गाडी, महागडी शाळा किंवा सामाजिक दिखाव्यावर तो अनावश्यक खर्च करत नाही. मात्र त्याला नवीन आयफोन प्रो घेण्याची आवड असून तो त्याची ईएमआय भरतो. 34 वर्षीय हा कुक आता मित्रांसोबत पहिल्यांदाच परदेश दौऱ्यावर जात आहे. तो थायलंडला जाणार असून ही त्याची पहिलीच हवाई यात्रा आणि पहिलाच पासपोर्ट असेल. या कहाणीतून आर्थिक यश म्हणजे फक्त मोठा पगार नव्हे, तर वेगवेगळ्या मार्गांतून कमाई, मर्यादित खर्च आणि स्वतःच्या हिशेबाने जगण्याचे स्वातंत्र्य हेच खरे आर्थिक स्थैर्य असल्याचा संदेश देण्यात आला आहे.