Mumbai News: महाराष्ट्र राज्य मार्ग परिवहन महामंडळात (एसटी) लवकरच सुमारे 13,980 चालक आणि यांत्रिकी कर्मचाऱ्यांची कंत्राटी पद्धतीने भरती केली जाणार आहे. या भरती प्रक्रियेत पारदर्शकता राखण्याचे आणि उमेदवारांची फसवणूक टाळण्याचे स्पष्ट निर्देश परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिले आहेत. नोकरीचे आमिष दाखवून बेरोजगार तरुणांकडून पैसे उकळणाऱ्या खासगी संस्था आणि संबंधित व्यक्तींविरोधात कठोर कारवाई करण्याचा इशाराही त्यांनी दिला आहे.
नंदुरबार : राज्याच्या राजकारणात सध्या दोन्ही राष्ट्रवादी काँग्रेसच्या विलीनीकरणाच्या चर्चांना जोर आला असतानाच, या प्रक्रियेत प्रदेशाध्यक्ष सुनील ...
भरती प्रक्रिया नियमांनुसार राबवण्याचे निर्देश
एसटी महामंडळातील चालक आणि यांत्रिकी कर्मचाऱ्यांची भरती बाह्य संस्थेमार्फत केली जाणार आहे. मात्र, उमेदवारांची निवड महामंडळाने निश्चित केलेल्या पात्रता निकषांनुसारच व्हावी, याची दक्षता संबंधित संस्था आणि एसटी प्रशासनाने घ्यावी, असे सरनाईक यांनी स्पष्ट केले. भरती प्रक्रियेत कोणत्याही उमेदवाराची फसवणूक झाल्यास त्याची जबाबदारी एसटी प्रशासनाची असेल, असेही त्यांनी सांगितले.
नोकरीचे आमिष दाखवून पैसे उकळणाऱ्या संस्थांवर कारवाई
एसटी महामंडळाच्या नावाचा गैरवापर करून काही खासगी संस्था बेरोजगार तरुणांना नोकरीचे आमिष दाखवत असल्याच्या तक्रारी प्रशासनाकडे आल्या आहेत. अशा संस्था उमेदवारांकडून अवैधरित्या पैसे उकळत असल्याचेही तक्रारींमध्ये नमूद करण्यात आले आहे. त्यामुळे नोकरीच्या अपेक्षेने पैसे देणाऱ्या तरुणांची आर्थिक फसवणूक होत असल्याची बाब समोर आली आहे.
या प्रकरणांची एसटी महामंडळाच्या सुरक्षा व दक्षता विभागामार्फत सखोल चौकशी करण्याचे निर्देश देण्यात आले आहेत. फसवणूक करणाऱ्या संस्था आणि संबंधित व्यक्तींची ओळख पटवून दोषींविरोधात तातडीने गुन्हे दाखल करण्यासही सांगण्यात आले आहे.
उमेदवारांच्या हिताला प्राधान्य
भरती प्रक्रियेच्या नावाखाली बेरोजगार तरुणांची आर्थिक लूट करणाऱ्यांची गय केली जाणार नाही, असे प्रताप सरनाईक यांनी स्पष्ट केले. भरती प्रक्रिया पारदर्शक आणि विश्वासार्ह असावी तसेच उमेदवारांच्या हिताचे रक्षण व्हावे, याला सर्वोच्च प्राधान्य देण्याचे निर्देश त्यांनी एसटी प्रशासनाला दिले आहेत.
