अंडर 19 आशिया कप स्पर्धेत आर्यवीर सेहवागकडून फार अपेक्षा होत्या. खासकरून अंतिम फेरीत आणि तेही पाकिस्तानविरुद्धच्या सामन्यात.. आर्यवीर सेहवागने आपल्या शैलीला साजेशी फलंदाजी केली आणि भारताच्या विजयात योगदान दिलं. त्याने क्रीडाप्रेमींना जराही निराश केलं नाही. आर्यवीर सेहवागला खरं अंतिम फेरीत दुखापत झाली होती. मात्र या दुखापतीवर मात करत त्याने 61 चेंडूत 9 चौकारांच्या मदतीने 58 धावा केल्या. त्याच्या या खेळीमुळे पाकिस्तानवर सुरूवातीपासून दडपण आलं. विजयानंतर आर्यवीर सेहवाग म्हणाला की, 'मला आता अजिबात वेदना होत नाहीत. आता कोणतीही वेदना उरलेली नाही. मला खूप आनंद होत आहे. आम्ही वेदना आणि बाकी सर्व काही पूर्णपणे विसरून गेलो आहोत. हा खरोखरच एक अविश्वसनीय विजय आहे. आम्ही खूप वेळ आत बसून देवाकडे प्रार्थना करत होतो. प्रामाणिकपणे सांगायचे तर, हा एखाद्या चमत्कारासारखा वाटला. माझ्या अंगावर अजूनही शहारे येत आहेत. एक प्रेक्षक म्हणून मी जे काही पाहिले, त्यावर माझा विश्वासच बसत नाहीये, कारण मी बाहेरून सर्व काही पाहत होतो. ही एक अविश्वसनीय भावना आहे. मी या क्षणाचा खूप आनंद घेतला.'
आर्यवीर सेहवाग म्हणाला की..
अंतिम सामन्यात वेदना सहन करत फलंदाजी करण्याबाबत आणि कशामुळे प्रेरणा मिळाली? या प्रश्नावर आर्यवीर म्हणाला की, 'जेव्हा भारत-पाकिस्तान सामना असतो आणि मी भारतासाठी खेळत असतो. हा माझा दुसरा भारत-पाकिस्तान सामना होता. दुर्दैवाने, पहिल्या सामन्यात मी लवकर बाद झालो होतो, त्यामुळे साहजिकच यावेळी मला माझ्या संघासाठी काहीतरी खास करायचे होते. मला खूप वेदना होत होत्या, पण मला मैदान सोडून बाहेर जायचे नव्हते. मला माहित होते की जर मी फलंदाजी सुरू ठेवली, तर मी पाकिस्तानी गोलंदाजीवर कोणत्या ना कोणत्या प्रकारे दबाव टाकत राहीन आणि मला त्यांच्यावर वर्चस्व गाजवायचे होते. या विजयामध्ये मी जे काही योगदान देऊ शकलो, त्याबद्दल मी अत्यंत कृतज्ञ आहे.'
अंडर 19 आशिया कप स्पर्धेच्या अंतिम फेरीत भारत पाकिस्तान हे संघ आमनेसामने आले होते. या सामन्यात एक क्षण असा होता की भारताच्या हातून हा सामना गेला. पण ...
ड्रेसिंग रूममध्ये काय चर्चा झाली होती?
धावांचा पाठलाग करण्यापूर्वी ड्रेसिंग रूममधील चर्चेबाबत आर्यवीर सेहवाग म्हणाला की, खेळपट्टी फलंदाजीसाठी खूप चांगली आहे आणि हे लक्ष्य फार मोठे नाही, अशी चर्चा ड्रेसिंग रूममध्ये झाली होती. जर आपण नेहमीप्रमाणे सहज फलंदाजी केली आणि आपले नैसर्गिक व पारंपरिक फटके खेळलो, तर आपण हे लक्ष्य नक्कीच गाठू, असा विचार होता. तसेच, आपण या धावांचा यशस्वी पाठलाग करू, असा विश्वास संघात नेहमीच होता.
लक्ष्य खूप मोठे असल्याने तुम्ही खेळण्याच्या रणनीतीत बदल करण्याचा विचार केला नाही का? या प्रश्नावर आर्यवीर म्हणाला की, 'नाही, तसं अजिबात नाही. कारण आम्हाला माहित आहे की आमच्या टीम मीटिंगमध्ये यावर नेहमी बोलणे होते की, खेळपट्टी फलंदाजीसाठी खूप चांगली असल्याने आपण शेवटच्या 10 षटकांत 100 किंवा 120 धावांचाही पाठलाग कसा करू शकतो. त्यामुळे कोणीतरी शेवटपर्यंत मैदानात टिकून फलंदाजी करणे गरजेचे होते आणि लक्ष्यने तेच करून दाखवले. त्यामुळे त्याला माझा सलाम. आणि अर्थातच, मोहित आणि मनालने शेवटी जे काही केले ते खरोखरच अद्भुत होते, त्यांनाही माझा सलाम.'
आर्यवीरची स्पर्धेतील कामगिरी
आर्यवीर सेहवागने या स्पर्धेतील पाच डावात 361 धावा केल्या आणि एका विक्रमाची नोंद केली. या खेळीत त्याने एक शतक आणि तीन अर्धशतके झळकावली. आर्यवीरने पाचपैकी चार डावांत 50 हून अधिक धावा केल्या. त्याची सरासरी 90.25 आणि स्ट्राइक रेट 95.50 होता.आर्यवीरने 38 चौकार आणि 16 षटकार मारले.
