जेरुसलेम : मध्यपूर्वेतील संघर्ष पुन्हा एकदा तीव्र झाला असून इस्रायली लष्कराने हमासला सर्वात मोठा धक्का दिला आहे. 7 ऑक्टोबर 2023 रोजी इस्रायलवर झालेल्या भीषण हल्ल्याचे नियोजन आणि देखरेख करणारा हमासचा वरिष्ठ कमांडर समीर अबू युनिस हा इस्रायली हवाई हल्ल्यात ठार झाला आहे. रविवारी हमासच्या सशस्त्र शाखेने (अल-कसम ब्रिगेड) या वृत्ताला अधिकृत दुजोरा दिला असून, या घटनेमुळे दहशतवादी संघटनेच्या गोटात मोठी खळबळ उडाली आहे.
मिळालेल्या माहितीनुसार, शनिवारी दक्षिण गाझा पट्टीतील खान युनिस परिसरातील मवासी भागातील एका रस्त्यावर इस्रायली हवाई दलाने हा अचूक हल्ला केला. या हल्ल्यात राफा ब्रिगेडचा कमांडर असलेला 53 वर्षीय समीर अबू युनिस जागीच ठार झाला, तर त्याच्यासोबत असलेले काही जण गंभीर जखमी झाले आहेत. इस्रायली लष्करानेही रविवारी हमासच्या एका वरिष्ठ कमांडरला लक्ष्य केल्याची माहिती दिली, मात्र सुरक्षेच्या कारणास्तव त्याचे नाव जाहीर केले नव्हते.
समीर अबू युनिस हा हमासच्या अत्यंत जुन्या आणि महत्त्वाच्या फळीतील नेता होता. 1991 मध्ये तो हमासच्या सशस्त्र शाखेत सहभागी झाला होता. राफा ब्रिगेडचा प्रमुख बनण्यापूर्वी त्याने राफा परिसरात अनेक महत्त्वाच्या कार्यकारी पदांवर काम केले होते. रविवारी दुपारी खान युनिस येथे त्याच्यावर अंत्यसंस्कार करण्यात येणार असल्याचे संघटनेकडून सांगण्यात आले आहे.
दरम्यान, ऑक्टोबर 2025 मध्ये झालेल्या युद्धविरामामुळे गाझामधील मोठ्या प्रमाणावरील संघर्ष काहीसा शांत झाला असला, तरी इस्रायलचे लक्ष्यित हवाई हल्ले अद्याप सुरूच आहेत. दुसरीकडे हमासचे पूर्णपणे निःशस्त्रीकरणही झालेले नाही. गाझामधील आरोग्य अधिकाऱ्यांच्या आकडेवारीनुसार, युद्धविराम लागू झाल्यापासून आतापर्यंत किमान 1,600 पॅलेस्टिनी नागरिकांचा मृत्यू झाला आहे, तर याच कालावधीत इस्रायलचे 5 सैनिकही मारले गेले आहेत.
ऑक्टोबर 2023 मध्ये हमासच्या दहशतवाद्यांनी दक्षिण इस्रायलमध्ये घुसून सुमारे 1,200 लोकांची निर्घृण हत्या केली होती. या हल्ल्याला प्रत्युत्तर म्हणून इस्रायलने गाझामध्ये सुरू केलेल्या लष्करी मोहिमेत आतापर्यंत 74,000 हून अधिक लोकांचा बळी गेला आहे. आता समीर अबू युनिसच्या खात्म्यामुळे या संघर्षाला कोणते नवे वळण लागते, याकडे संपूर्ण जगाचे लक्ष लागले आहे.