कार्तिकी वारीसाठी 5 कोटींचा निधी! चंद्रभागेच्या घाटावर उतरले उपमुख्यमंत्रीएकनाथ शिंदे, स्वतः हातात पाइप घेऊन केली स्वच्छता

कार्तिकी एकादशी यात्रेसाठी पंढरपूर नगरपालिकेला 5 कोटींचा निधी देण्यात आला आहे. स्वच्छता, आरोग्य, शुद्ध पाणी आणि दर्शन रांगेसाठी विशेष व्यवस्था करण्यात आली असून, उपमुख्यमंत्री एकनाथ शिंदे यांनी चंद्रभागेच्या घाटावर स्वतः पाइप हातात घेऊन स्वच्छता केली. बोटीतून फेरफटका मारत त्यांनी वारकऱ्यांसाठीच्या सुविधांचा आढावा घेतला.

पंढरपूर : कार्तिकी एकादशी यात्रेसाठी पंढरपुरात दाखल होणाऱ्या लाखो वारकऱ्यांना स्वच्छ, सुरक्षित आणि दर्जेदार सुविधा उपलब्ध करून देण्यासाठी राज्य सरकार आणि पंढरपूर नगरपालिका सज्ज झाली आहे. यात्रेच्या व्यवस्थापनासाठी नगरपालिकेला तब्बल 5 कोटी रुपयांचा निधी देण्यात आला असून, स्वच्छता, आरोग्य, पिण्याचे पाणी, दर्शन रांग आणि निवास व्यवस्थेसाठी व्यापक नियोजन करण्यात आले आहे. उपमुख्यमंत्री एकनाथ शिंदे यांनी यात्रेच्या तयारीचा प्रत्यक्ष आढावा घेत प्रशासनाला आवश्यक सूचना दिल्या.


कार्तिकी एकादशीच्या पार्श्वभूमीवर उपमुख्यमंत्री एकनाथ शिंदे यांनी पंढरपूरमध्ये मोटारसायकलवरून फेरफटका मारत विविध व्यवस्थांची पाहणी केली. त्यानंतर चंद्रभागेच्या पात्रात बोटीतून फेरफटका मारून घाट परिसरातील सुविधांचा आढावा घेतला. यावेळी पत्रकारांशी संवाद साधताना वारकऱ्यांच्या सुविधांसाठी प्रशासनाने सर्वतोपरी तयारी केल्याचे त्यांनी सांगितले.


यात्रेदरम्यान मोठ्या संख्येने भाविक दाखल होण्याची शक्यता लक्षात घेऊन रस्त्यांची दुरुस्ती, स्वच्छता, पिण्याचे पाणी आणि आरोग्य सुविधांना प्राधान्य देण्यात आले आहे. वारकऱ्यांना शुद्ध पाणी उपलब्ध व्हावे यासाठी विविध ठिकाणी वॉटर प्युरिफायर यंत्रणा बसवण्यात आली आहे. आरोग्य शिबिरे उभारण्यात आली असून, रुग्णालयातील अतिदक्षता विभागाचीही शिंदे यांनी पाहणी केली.


स्वच्छतेच्या बाबतीत विशेष खबरदारी घेण्यात आली आहे. शौचालये आणि स्नानगृहांची दिवसातून 4 ते 5 वेळा स्वच्छता करण्याचे नियोजन आहे. चंद्रभागा परिसरात चेंजिंग रूम, शौचालये, स्नानगृहे आणि घाटांवर आवश्यक सुविधा उपलब्ध करण्यात आल्या आहेत. नव्याने विकसित केलेल्या घाटांमुळे गर्दीचे व्यवस्थापन अधिक प्रभावी होण्यास मदत होणार आहे. रेल्वे परिसरातील सुमारे 65 एकर जागेचाही यात्रेच्या नियोजनासाठी उपयोग करण्यात येणार आहे.


दर्शन रांगेत वारकऱ्यांना तासन्तास उभे राहावे लागू नये, यासाठी पंखे, कुलर आणि बसण्याची व्यवस्था करण्यात येत आहे. कोणत्याही भाविकाची गैरसोय होणार नाही, यासाठी प्रशासनाला सतर्क राहण्याच्या सूचना देण्यात आल्या आहेत.






चंद्रभागेच्या घाटावर एकनाथ शिंदेंनी स्वतः केली स्वच्छता


पाहणीदरम्यान चंद्रभागेच्या तीरावर पायऱ्यांची पाइपद्वारे स्वच्छता सुरू असल्याचे पाहून उपमुख्यमंत्री एकनाथ शिंदे यांनी स्वतः कर्मचाऱ्यांच्या हातातील पाइप घेत पायऱ्यांची स्वच्छता केली. त्यानंतर बोटीतून चंद्रभागेच्या पात्रात फेरफटका मारत घाट परिसरातील सुविधांची पाहणी केली. यावेळी माजी आमदार शहाजीबापू पाटील, आमदार अभिजित पाटील, आमदार राजू खरे, माजी मंत्री सिद्धराम म्हेत्रे, नगराध्यक्ष डॉ. प्रणिता भालके, जिल्हाधिकारी एस. कार्तिकेयन यांच्यासह विविध पदाधिकारी आणि कार्यकर्ते उपस्थित होते. कार्तिकी यात्रेत वारकऱ्यांना उत्तम सुविधा मिळाव्यात, यासाठी प्रशासनाकडून यंदा विशेष तयारी करण्यात आली आहे.

Comments
Add Comment

Pimpri Chinchwad : पिंपरी-चिंचवड वाहतूक पोलिसांचा मोठा निर्णय; 350 बॉडी कॅमेऱ्यांची करडी नजर, आता चुकूनही नियम मोडू नका

पुणे : वाहतूक नियमांची अंमलबजावणी करताना पारदर्शकता आणि उत्तरदायित्व वाढवण्यासाठी पिंपरी-चिंचवड वाहतूक

Sanjay Pandey : माजी पोलीस आयुक्त संजय पांडे यांना मोठा दिलासा; सर्वोच्च न्यायालयाकडून पुनामिया यांची याचिका फेटाळली

मुंबई : माजी मुंबई पोलीस आयुक्त संजय पांडे यांच्याविरोधात दाखल करण्यात आलेले दोन एफआयआर रद्द करण्याच्या मुंबई

LPG tanker : ज्वलनशील पदार्थांची अवैध उतराई करणाऱ्यांवर कठोर कारवाई करा- मंत्री प्रताप सरनाईक

मुंबई : एलपीजी, प्रोपिलीन यांसारख्या ज्वलनशील पदार्थांची टँकरमधून ढाबे अथवा अनधिकृत गोदामांमध्ये होणारी उतराई

राज्यात आता ३१० तालुके दुष्काळी - मुख्यमंत्र्यांशी चर्चेनंतर हातकणंगले, गडहिंग्लजचा नव्याने समावेश

मुंबई : राज्यातील दुष्काळी तालुक्यांची संख्या ३१० वर पोहोचली आहे. विक्रमगड, वाडा, दिंडोरी आणि चिपळूण या सोबतच

Varsha Turkar Murder Case : पतीच्या मैत्रिणीच्या हत्येसाठी पत्नीने दिली 13 लाखांची सुपारी; वर्षा तुरकर हत्या प्रकरणाचा उलगडा

गोंदिया : गोंदिया जिल्ह्यातील बोंडराणी जंगलात झालेल्या वर्षा तुरकर हत्या प्रकरणाचा उलगडा करण्यात पोलिसांना यश

Chandrashekhar Bawankule : दुष्काळात शेतकऱ्यांना वसुलीसाठी त्रास देणाऱ्या फायनान्स कंपन्यांवर कारवाई -महसूलमंत्री चंद्रशेखर बावनकुळे

मुंबई : राज्यातील दुष्काळी परिस्थिती आणि पाणीटंचाईच्या पार्श्वभूमीवर शेतकऱ्यांना दिलासा देण्यासाठी सरकारने