Assam Elephant Calf : आईने नाकारले, पण 'वनतारा'ने स्वीकारले; आसाममधील जखमी हत्तीच्या पिल्लाला विशेष विमानाने गुजरातला आणणार

'राजा' असे या चिमुकल्या हत्तीचे नाव असून, त्याच्यावर चांगले आणि आधुनिक उपचार व्हावेत यासाठी आज (२० नोव्हेंबर) त्याला आसाममधून थेट गुजरातमधील जामनगर येथे विशेष विमानाने (एअरलिफ्ट) आणले जात आहे. जामनगर येथील 'वनतारा' या वन्यजीव बचाव आणि पुनर्वसन केंद्राचे संस्थापक अनंत अंबानी यांनी या चिमुकल्या हत्तीचा जीव वाचवण्यासाठी पुढाकार घेतला आहे.

जामनगर : जन्मानंतर अवघ्या काही दिवसांतच स्वतःच्या आईकडून नाकारल्या गेलेल्या आणि गंभीर जखमी झालेल्या एका दोन महिन्यांच्या हत्तीच्या पिल्लासाठी गुजरातमधील 'वनतारा' प्रकल्प आशेचा किरण ठरला आहे. 'राजा' असे या चिमुकल्या हत्तीचे नाव असून, त्याच्यावर चांगले आणि आधुनिक उपचार व्हावेत यासाठी आज (२० नोव्हेंबर) त्याला आसाममधून थेट गुजरातमधील जामनगर येथे विशेष विमानाने (एअरलिफ्ट) आणले जात आहे. जामनगर येथील 'वनतारा' या वन्यजीव बचाव आणि पुनर्वसन केंद्राचे संस्थापक अनंत अंबानी यांनी या चिमुकल्या हत्तीचा जीव वाचवण्यासाठी पुढाकार घेतला आहे. राजाला तातडीने वैद्यकीय मदत आणि २४ तास तज्ज्ञांची देखरेख मिळावी, यासाठी त्यांनी या विशेष विमानाची तातडीने व्यवस्था केली आहे.






'राजा'सोबत नेमके काय घडले होते ?




आसाममधील लखीमपूर जिल्ह्यातील पाहमारा गावात राहणारे भुवन पेगू यांच्याकडे 'माखोनी' नावाची पाळीव हत्तीण आहे. तिने २ ऑक्टोबर रोजी गोगमुख येथील रुपाही जंगल परिसरात एका गोंडस पिल्लाला जन्म दिला, ज्याचे नाव 'राजा' ठेवण्यात आले. मात्र, जन्मापासूनच राजाच्या नशिबी मोठा संघर्ष आला. मिळालेल्या माहितीनुसार, जन्म झाल्यानंतर काही वेळातच हत्तीणीने राजाला स्वतःपासून दूर लोटले आणि त्याला स्वतःचे दूध पाजण्यासही नकार दिला. इतकेच नाही, तर आईने मारलेल्या लाथेमुळे या चिमुकल्याच्या एका पायाचे हाड मोडले (फ्रॅक्चर झाले). दुधाविना उपाशी आणि पायाला गंभीर दुखापत झालेल्या राजाला पाहून 'वनतारा'च्या एका अनुभवी पशुवैद्यकीय डॉक्टरांनी तातडीने त्याच्यावर प्राथमिक उपचार सुरू केले. राजाला जामनगरला नेण्याची व्यवस्था होईपर्यंत या डॉक्टरांनी त्याला स्वतःच्या घरीच ठेवून एखाद्या लहान बाळासारखी त्याची काळजी घेतली.





२,५०० किलोमीटरचा प्रवास अवघ्या ५ तासांत पूर्ण होणार






राजाच्या पायाचे हाड मोडल्याने त्याला अधिक मोठ्या उपचारांची गरज आहे. त्यामुळेच त्याला जामनगरच्या 'वनतारा' केंद्रात हलवण्याचा निर्णय घेण्यात आला. त्यानुसार, गुरुवारी रात्री राजाला मोठ्या काळजीपूर्वक गुवाहाटी येथे आणण्यात आले. आज शुक्रवारी दुपारी १२ वाजताच्या सुमारास गुवाहाटी विमानतळावरून सर्व सुविधांनी सज्ज असलेल्या एका विशेष चार्टर्ड विमानाने राजा जामनगरकडे रवाना होईल. आसाम ते गुजरात हे २,५०० किलोमीटरहून अधिकचे अंतर जर रस्तेमार्गे पार केले असते, तर त्याला अनेक दिवस लागले असते आणि जखमी राजाला या प्रवासाचा प्रचंड त्रास झाला असता. मात्र, विमानामुळे हा प्रवास केवळ पाच तासांत पूर्ण होणार आहे. या संपूर्ण विमान प्रवासात पशुवैद्यकीय डॉक्टरांचे एक खास पथक राजासोबत असणार आहे, जे प्रवासादरम्यान त्याच्या प्रकृतीची आणि आरामाची पूर्ण काळजी घेईल.



'वनतारा'मध्ये राजावर कशा प्रकारे उपचार होणार ?


जामनगरला पोहोचल्यानंतर राजाच्या मोडलेल्या पायावर हाडांच्या तज्ज्ञ डॉक्टरांकडून (ऑर्थोपेडिक) विशेष उपचार केले जातील. तो पुन्हा आपल्या पायांवर नीट उभा राहून चालू शकेल, यासाठी त्याचे पुनर्वसन केले जाईल. तसेच, आईचे दूध न मिळालेल्या राजाला विशेष पौष्टिक आहार दिला जाईल आणि २४ तास डॉक्टर त्याच्यावर लक्ष ठेवतील. तो पूर्णपणे बरा होईपर्यंत 'वनतारा'मध्येच त्याची दीर्घकाळ काळजी घेतली जाणार आहे. अनंत अंबानी यांच्या पुढाकाराने भारतामध्ये अशा प्रकारे एखाद्या जखमी वन्यजीवाला विशेष विमानाने उपचारासाठी नेण्याची ही तिसरी घटना आहे. राजा सुखरूप जामनगरला पोहोचल्यानंतर त्याच्या पुढील उपचारांची आणि प्रकृतीची माहिती लवकरच समोर येईल.

Comments
Add Comment

IBPS Mains Result 2026 : IBPS PO मुख्य परीक्षेचा निकाल जाहीर; 7,565 पदांसाठी भरती, पात्र उमेदवारांना मुलाखतीची संधी

Education News: बँकिंग क्षेत्रात नोकरीच्या शोधात असलेल्या उमेदवारांसाठी महत्त्वाची बातमी आहे. इन्स्टिट्यूट ऑफ बँकिंग

PM Modi Bihar Visit : PM मोदींचा वैशाली दौरा! बिहारला मिळणार ३४,४७० कोटींच्या प्रकल्पांची मोठी भेट!

नवी दिल्ली : पंतप्रधान नरेंद्र मोदी उद्या, शनिवार (२१ नोव्हेंबर) रोजी बिहारच्या महत्त्वपूर्ण दौऱ्यावर जात आहेत.

Unique Temples In India : देवाला वाहिली जाते दारू, पेटती सिगारेट आणि खेळण्यातली विमाने! भारतातील या अनोख्या मंदिरांमधील विचित्र प्रथा वाचून व्हाल थक्क

नवी दिल्ली : आपल्या देशात मंदिरात गेल्यानंतर देवाच्या चरणी फुले, नारळ, पेढे आणि अगरबत्ती वाहणे ही अगदी नेहमीची

Yogi Adityanath News : योगी आदित्यनाथ यांच्यावर दुःखाचा डोंगर; मातोश्री सावित्री देवी यांचे निधन, कंगना रणौतची भावूक पोस्ट

उत्तर प्रदेशचे मुख्यमंत्री योगी आदित्यनाथ यांच्यावर आज दुःखाचा डोंगर कोसळला आहे. त्यांच्या मातोश्री सावित्री

उत्तर प्रदेशचे मुख्यमंत्री योगी आदित्यनाथ यांना मातृशोक, वयाच्या 91 व्या वर्षी घेतला अखेरचा श्वास

उत्तर प्रदेश: उत्तर प्रदेशचे मुख्यमंत्री योगी आदित्यनाथ यांच्या आई सावित्री देवी यांचे शुक्रवारी उत्तराखंड

OM movie advance booking : प्रदर्शनापूर्वीच धनुषच्या 'ओएम'चा बॉक्स ऑफिसवर धमाका; ॲडव्हान्स बुकिंगमध्ये 'रायन'चा विक्रम मोडला

मुंबई : दाक्षिणात्य सुपरस्टार धनुषचा बहुप्रतिक्षित ॲक्शन थ्रिलर चित्रपट 'ओएम : चॅप्टर १ - उधिरम' (OM: Chapter 1 - Udhiram)