Sunday, November 22, 2026

Delhi News : 55 लाखांचे सोन्याचे दागिने असलेली बॅग हरवली; दिल्ली पोलिसांनी सहा दिवसांत शोधून मालकाला केली परत

मात्र, तपासात दोन प्रवाशांच्या बॅगांची चुकून अदलाबदल झाल्याचे स्पष्ट झाले. संबंधित व्यक्तीने बॅग सुरक्षित ठेवली होती आणि पोलिसांशी संपर्क झाल्यानंतर ती परत केली.

दिल्ली : दिल्लीतील काश्मिरी गेट आंतरराज्य बस स्थानकावर (ISBT) हरवलेली सुमारे 55 लाख रुपये किमतीच्या सोन्याच्या दागिन्यांची बॅग पोलिसांनी सहा दिवसांच्या तपासानंतर शोधून काढली आहे. विशेष म्हणजे, सुरुवातीला ही चोरी असल्याचा संशय व्यक्त करण्यात आला होता. मात्र, तपासात दोन प्रवाशांच्या बॅगांची चुकून अदलाबदल झाल्याचे स्पष्ट झाले. संबंधित व्यक्तीने बॅग सुरक्षित ठेवली होती आणि पोलिसांशी संपर्क झाल्यानंतर ती परत केली.

एक्स-रे स्क्रिनिंग मशीनजवळून बॅग गायब

पोलिसांच्या माहितीनुसार, 12 नोव्हेंबर रोजी अमृत राज वर्मा यांनी काश्मिरी गेट पोलीस ठाण्यात तक्रार दाखल केली. ISBT च्या पहिल्या मजल्यावरील प्रवेशद्वाराजवळ असलेल्या एक्स-रे स्क्रिनिंग मशीनजवळ त्यांची काळ्या रंगाची बॅग हरवल्याचे त्यांनी सांगितले.

या बॅगेमध्ये सोन्याचे दागिने, कपडे, आधार कार्ड, मोबाईल चार्जर आणि सुमारे 9,000 रुपये रोख होते. दागिन्यांची किंमत अंदाजे 55 लाख रुपये असल्याचे तक्रारदाराने सांगितले. यानंतर 13 नोव्हेंबर रोजी पोलिसांनी ई-एफआयआर दाखल करून तपास सुरू केला.

सीसीटीव्ही आणि आर्थिक व्यवहारांच्या आधारे तपास

पोलिसांनी बस स्थानकातील सीसीटीव्ही फुटेज तपासून बॅग घेऊन गेलेल्या व्यक्तीचा माग काढण्यास सुरुवात केली. यासाठी विविध बस मार्ग, तिकीट नोंदी आणि आर्थिक व्यवहारांचीही पडताळणी करण्यात आली.

तपासादरम्यान पोलिसांना बंगळुरूहून सुरू झालेल्या बस प्रवासाशी संबंधित माहिती मिळाली. तांत्रिक तपास आणि सीसीटीव्ही फुटेजच्या आधारे पथकाने 18 नोव्हेंबर रोजी उत्तराखंडमधील रुद्रप्रयाग येथे संबंधित व्यक्तीचा शोध घेतला. ही व्यक्ती बंगळुरूमध्ये काम करणारी स्थानिक रहिवासी असल्याचे समोर आले.

चुकीची अदलाबदल झाल्याचे आले समोर

पोलिसांच्या म्हणण्यानुसार, संबंधित व्यक्तीला आपल्या गंतव्यस्थानी पोहोचल्यानंतर बॅगांची अदलाबदल झाल्याचे लक्षात आले होते. तिने पोलिसांना फोन करण्याचाही प्रयत्न केला होता. मात्र, तोपर्यंत ती दिल्लीबाहेर गेली असल्याने संपर्क होऊ शकला नाही.

पोलिसांनी संपर्क साधल्यानंतर संबंधित व्यक्तीने बॅग परत केली. त्यातील सुमारे 55 लाख रुपये किमतीचे सोन्याचे दागिने सुरक्षित मिळाले असून ते मूळ मालकाला परत करण्यात आले आहेत.

Comments
Add Comment
प्रहार ई-पेपर
हे पण पहा


संबंधित बातम्या आणखी वाचा >