नवी दिल्ली : टोकियो २०२० ऑलिम्पिकमध्ये भारताचे प्रतिनिधित्व करणारा ३१ वर्षीय भालाफेकपटू शिवपाल सिंग याच्यावर दुसऱ्यांदा डोपिंग नियमांचे उल्लंघन केल्याप्रकरणी १० वर्षांची बंदी घालण्यात आली आहे. या कारवाईमुळे त्याची ॲथलेटिक्स कारकीर्द संपुष्टात येण्याची शक्यता आहे.
'मिथँडिएनोन' या प्रतिबंधित ॲनाबॉलिक स्टिरॉइडच्या चाचणीत पॉझिटिव्ह आढळल्यानंतर राष्ट्रीय अँटी-डोपिंग एजन्सीच्या शिस्तपालन समितीने ही कडक कारवाई केली आहे. शिवपालने डोपिंग नियमांचे उल्लंघन करण्याची ही दुसरी वेळ आहे. यापूर्वी २०२१ मधील आउट-ऑफ-कॉम्पिटिशन चाचणीत तो दोषी आढळला होता. त्यावेळी 'नाडा'च्या शिस्तपालन समितीने त्याच्यावर ४ वर्षांची बंदी घातली होती. मात्र, दूषित पूरक आहारांमुळे असे घडल्याचा युक्तिवाद शिवपालने अपीलादरम्यान केल्यानंतर, जानेवारी २०२३ मध्ये ही बंदी घटवून १ वर्ष करण्यात आली होती. या शिक्षेनंतर एप्रिल २०२३ मध्ये त्याने स्पर्धात्मक खेळात पुनरागमन केले आणि भुवनेश्वर येथे झालेल्या नॅशनल इंटर-स्टेट चॅम्पियनशिपमध्ये कांस्यपदक, तर गोव्यातील राष्ट्रीय खेळांमध्ये सुवर्णपदक पटकावले होते.
शिवपाल सिंगच्या कारकीर्दीतील सर्वात मोठे यश २०१९ मध्ये दोहा येथे झालेल्या आशियाई ॲथलेटिक्स चॅम्पियनशिपमध्ये आले होते, जिथे त्याने ८६.२३ मीटर भाला फेकून (वैयक्तिक सर्वोत्तम कामगिरी) रौप्यपदक पटकावले होते. मार्च २०२५ मध्ये झालेल्या इंडियन ओपन थ्रो स्पर्धेत तो अखेरचा सहभागी झाला होता, जिथे त्याने दुसरे स्थान मिळवले होते. वय लक्षात घेता, १० वर्षांच्या या नव्या निलंबनामुळे त्याची क्रीडा कारकीर्द जवळपास संपुष्टात आली आहे.
