DCM Sunetra Pawar: बारामतीतील 'त्या' घटनेबाबत उपमुख्यमंत्री सुनेत्रा पवार यांनी व्यक्त केलं दु:ख, म्हणाल्या...

पुणे: बारामती तालुक्यातील शेरेवाडी गावामध्ये घडलेल्या घटनेमुळे संपूर्ण महाराष्ट्र हादरला आहे. शेरेवाडी गावामध्ये मध्यरात्री घरामध्ये झोपलेल्या दोन वयोवृद्ध महिलांची एका अज्ञात व्यक्तीने हत्या केल्याची घटना घडली आहे. कृष्णाबाई लडकत आणि इंदुमती लडकत अशा दोन मृत महिलांची नावे आहेत. या प्रकरणावर उपमुख्यमंत्री सुनेत्रा पवार यांनी प्रतिक्रिया दिली आहे. उपमुख्यमंत्र्यांनी एक्सवर पोस्ट शेअर करत बारामतीतील घटनेच्या चौकशीची मागणी केलेली आहे. शेअर केलेल्या एक्स पोस्टमध्ये उपमुख्यमंत्री सुनेत्रा पवार यांनी लिहिलंय की, "बारामती तालुक्यातील शेरेवाडी येथे दोन वृद्ध महिलांच्या हत्येची घटना अत्यंत दुःखद आहे. शेरेवाडी (बाबुर्डी) येथे घराच्या ओसरीत झोपलेल्या दोन महिलांची धारदार शस्त्राने हल्ला करून हत्या झाल्याची घटना समोर आली आहे. या घटनेची माहिती मिळताच पोलिसांनी घटनास्थळी दाखल होत तपासाला सुरुवात केली आहे. घटनेची गंभीर दखल घेण्यात आली असून, आरोपीचा लवकरात लवकर शोध घेण्यासाठी पोलिसांकडून तपास सुरू आहे. परिसरातील सीसीटीव्ही फुटेज, घटनास्थळी मिळालेले पुरावे आणि इतर सर्व बाबींच्या आधारे तपास सुरू आहे. या दुःखद घटनेत मृत्यू झालेल्या दोन्ही महिलांना भावपूर्ण श्रद्धांजली. त्यांच्या कुटुंबीयांच्या दुःखात मी सहभागी आहे. तपासातून घटनेमागील नेमकं कारण आणि संबंधित व्यक्तींची माहिती लवकरच समोर येईल, अशी अपेक्षा आहे."  

बारामती तालुक्यातील शेरेवाडी येथे दोन वृद्ध महिलांच्या हत्येची घटना अत्यंत दुःखद आहे. शेरेवाडी (बाबुर्डी) येथे घराच्या ओसरीत झोपलेल्या दोन महिलांची धारदार शस्त्राने हल्ला करून हत्या झाल्याची घटना समोर आली आहे. या घटनेची माहिती मिळताच पोलिसांनी घटनास्थळी दाखल होत तपासाला सुरुवात…

— Sunetra Ajit Pawar (@SunetraA_Pawar) September 29, 2026

नेमकी घटना काय आहे?

मिळालेल्या माहितीनुसार, सोमवारी रात्री दोन महिला घरामध्ये गाढ झोपल्या होत्या. झोपेतच एका अज्ञात व्यक्तीने या दोन्हीही वयोवृद्ध महिलांची धारदार शस्त्राने हल्ला करून हत्या केली. शेरेवाडी गावामध्ये हत्या झाल्याची माहिती मिळताच, गावातील पोलिस अधिकारी आणि कर्मचारी घटनास्थळी दाखल झाले. घटनास्थळाची पाहणी करून पोलिसांकडून उपलब्ध पुरावे गोळा करण्याचं काम पोलिसांकडून सुरू आहे. हत्या नेमकी कोणत्या कारणामुळे घडली? हत्येमागील नक्की कारण काय? हत्येचा मुख्य मास्टरमाईंड कोण? अशा एक ना अनेक प्रश्नांचा उलगडा आता पोलिसांकडून केला जात आहे.