नाशिक : मकर संक्रांतीच्या (Makar Sankranti 2025) दिवशी मोठ्या प्रमाणात पतंग उडवले जातात. मात्र पतंग उडवताना अनेकवेळी नायलॉन मांजा किंवा चिनी मांज्याचा वापर केला जातो. परंतु अशा मांजामुळे माणसांसह अनेक पक्षांचा जीव धोक्यात येतो. त्यामुळे प्रशासनाने नायलॉन मांजावर बंदी (Nylon Manja Ban) घातली असून नायलॉन मांजा वापरणाऱ्यांविरोधात कठोर कारवाई करण्याच्या घोषणा केल्या होत्या. मात्र तरीही अनेक ठिकाणी नायलॉन मांजा वापरात असल्याचे दिसून आले. सातत्याने नायलॉन मांजामुळे जखमी होण्याच्या तक्रारी वाढत असताना नाशिकमध्येही (Nashik News) अशीच घटना घडल्याचे समोर आले आहे.
नाशिक जिल्ह्यात नायलॉन मांजामुळे तीन जण गंभीर जखमी झाले आहेत. मांजा गळ्यात अडकल्यामुळे दोन शाळकरी मुलं तर नाशिकच्या मनमाडमध्ये गॅस सिलंडरचा वाटप करणाऱ्या तरुणाच्या गळ्यात मांजा अडकल्यामुळे जखमी झाले आहेत. मयूर निकम आणि ओम ठाकरे ही शाळकरी मुले घरी जात असताना तर काकासाहेब भालेराव सिलेंडर वाटप करताना ही घटना घडली. सध्या या तिघांवर रुग्णालयात उपचार सुरु आहेत. मात्र वारंवार प्रशासनाच्या सुचना आणि कारवाई करुनही नायलॉन मांजाचा वापर सुरुच असल्याचे दिसत आहे.
नायलॉन मांजा वापरणाऱ्याविरुद्ध पोलीस अॅक्शन मोडवर
दरम्यान, नायलॉन मांजा वापरणाऱ्याविरुद्ध नाशिकच्या येवला परिसरात पोलीस अॅक्शन मोडवर आले आहेत. आतापर्यंत पोलिसांनी चार जणांना ताब्यात घेतले असून ३५ हजार रुपयांचा मांजा जप्त करण्यात आला आहे.