नाशिक: आयकर विभागाचा अधिकारी असल्याचे सांगून माजी मंत्री छगन भुजबळ (Chhagan Bhujbal) यांचे स्वीय सहाय्यक संतोष गायकवाड यांच्याकडे १ कोटी रुपयांची खंडणी मागणाऱ्याला पोलिसांनी अटक केली आहे. हा खंडणीखोर 27 वर्षाचा उच्चशिक्षित तरुण असून, त्याचे आव दिलीप भुसारे असे आहे. नाशिक गुन्हे शाखेच्या युनिट क्र. १ च्या पथकाने करंजाळी येथील हॉटेलमध्ये सापळा रचून त्याला रंगेहाथ अटक केली.
छगन भुजबळचे स्वीय सहाय्यक गायकवाड यांच्या मोबाईलवर अज्ञात क्रमांकांवरून वारंवार फोन येत होते. आरोपी स्वतःला आयकर अधिकारी सांगून त्र्यंबकेश्वर येथील फार्म हाऊसवर रेड पडणार असल्याची धमकी देत त्याच्या मोबदल्यात १ कोटी रुपये मागत होता. पैसे न दिल्यास कारवाई करण्याची धमकी त्याने गायकवाड यांना दिली होती. मात्र स्वीय सहाय्यक यांनी या प्रकरणाची माहिती पोलीस आयुक्त संदीप कर्णिक यांना दिली. त्यानंतर पोलीस उप-आयुक्त (गुन्हे) प्रशांत बच्छाव यांनी कारवाईचे आदेश दिले. वरिष्ठ पोलीस निरीक्षक मधुकर कड यांच्या मार्गदर्शनाखाली पथकाने सापळा रचत गायकवाड यांना गुजरातच्या धरमपूर येथे बोलावून आरोपीस पैसे देण्यासाठी आणण्यास सांगितले.त्यांनंतर आरोपी राहुल दिलीप भुसारेला रंगेहाथ अटक केली गेली. या प्रकरणी अंबड पोलीस ठाण्यात गुन्हा दाखल करण्यात आला असून पुढील तपास अंबड पोलीस करत आहेत. पोलीस आयुक्त संदीप कर्णिक, पोलीस उप-आयुक्त (गुन्हे) प्रशांत बच्छाव, सहायक पोलीस आयुक्त संदीप मिटके यांच्या मार्गदर्शनाखाली ही कारवाई करण्यात आली.