मुंबई : पावसाळ्याचा काळ सुरू झाला की, कपडे न सुकण्याची एक मोठी समस्या निर्माण होते. सततच्या पावसामुळे कपड्यांमध्ये ओलावा राहतो आणि एक प्रकारचा कुबट वास येऊ लागतो. अनेकदा हे कपडे व्यवस्थित सुकत नाहीत, त्यामुळे अस्वच्छ आणि ओलसर वाटतात. पण काही सोप्या युक्त्या वापरून तुम्ही ही समस्या टाळू शकता आणि कपडे लवकर सुकवू शकता.
कपडे सुकवण्यासाठी काही उपयुक्त युक्त्या
सुका टॉवेल वापरा: ओले कपडे एका मोठ्या सुक्या टॉवेलमध्ये गुंडाळा आणि दाबून ठेवा. यामुळे टॉवेल कपड्यातील अतिरिक्त पाणी शोषून घेतो आणि कपडे लवकर सुकतात. ही पद्धत कपड्यातील ओलावा कमी करण्यासाठी खूप प्रभावी आहे.
फॅन किंवा टेबल फॅनचा वापर: कपडे हँगरवर योग्य अंतरावर लटकवा आणि त्यांच्या समोर फॅन किंवा टेबल फॅन सुरू करा. पंख्याची हवा कपड्यांमधील ओलावा काढून टाकण्यास मदत करते आणि कपडे लवकर वाळतात.
हेअर ड्रायर किंवा इस्त्री: जर तुम्हाला एखादे लहान कपडे तातडीने सुकवायचे असतील, तर हेअर ड्रायरचा उपयोग करू शकता. इस्त्री वापरताना, कपड्यावर थेट इस्त्री फिरवू नका, त्याऐवजी सुक्या कापडावर इस्त्री गरम करून मग ओल्या कपड्यावर फिरवा. यामुळे कपडे खराब होणार नाहीत.
हिटर किंवा ब्लोअर: मोठ्या जागेतील कपडे सुकवण्यासाठी हिटर किंवा ब्लोअरचा वापर करता येतो. मात्र, हे करताना पुरेशी खबरदारी घेणे आवश्यक आहे. हिटरला कपड्यांपासून सुरक्षित अंतरावर ठेवा आणि खोलीत हवा खेळती राहण्याची व्यवस्था करा.
योग्य ठिकाणी कपडे वाळत घाला: कपडे नेहमी हवेशीर आणि कोरड्या खोलीत वाळत घाला. कपड्यांमध्ये पुरेशी जागा सोडा जेणेकरून हवा सहजपणे फिरू शकेल. कपडे एकत्र करून ठेवल्यास ते अधिक ओलसर राहतात.
अशा प्रकारे, पावसाळ्यात कपडे सुकवण्याची समस्या तुम्हाला भेडसावत असेल तर या सोप्या पद्धती वापरून तुम्ही ही अडचण सहज दूर करू शकते.