मनोरंजन क्षेत्रासह राजकारण आणि समाजकारण या क्षेत्रात देखील सक्रिय असणारे अभिनेता सुशांत शेलार कायमच सामाजिक उपक्रमात अग्रेसर असतात. कोविड काळ अथवा पूरपरिस्थिती गरज असेल त्याला आपल्यापरीने मदतीचा हात त्यांनी दिलाआहे. 'शेलार मामा फाउंडेशन' द्वारे ते विविध सामाजिक उपक्रम राबवतात, ज्यात सांस्कृतिक कार्यक्रम आणि समाजासाठी गरजूंना मदत करत आपलं सामाजिक भान जपलं आहे.
एसएससीबीसीएल(SSCBCL) मध्ये महाराष्ट्रातील वेगवेगळ्या जिल्ह्यांमधील कलाकारांचा खेळ आपल्याला पाहायला मिळणार आहे. यात काही संघ असतील. या संघामध्ये पुरुष कलाकारांसोबत महिला कलाकार, माध्यमकर्मी आणि इन्फ्लुएन्सर देखील सहभागी होणार आहेत. लवकरच हे संघ जाहीर होणार असून पर्यावरण, संस्कृती, गडकिल्ले यांचे स्मरण रहावे यासाठी टीमची नावे त्या अनुषंगाने दिली आहेत. रत्नदुर्ग-रत्नागिरी, सिंधुदुर्ग-मालवण, ताडोबा-नागपूर, अजिंक्यतारा- सातारा, शिवनेरी -पुणे, पन्हाळा-कोल्हापूर, गोदावरी-नाशिक अशा काही टीमचा समावेश असणार आहे. एसएससीबीसीएल (SSCBCL) तसेच संघाच्या टीम मधील कलाकारांची घोषणा, लोगोचे अनावरण मा.उपमुख्यमंत्री एकनाथ शिंदे यांच्या उपस्थितीत लवकरच करण्यात येणार असल्याचे या लीगचे सर्वेसर्वा अभिनेता सुशांत शेलार यांनी सांगितले.
अभिनेता सुशांत शेलार वेगवेगळ्या मनोरंजनात्मक उपक्रमाच्या माध्यमातून नवनवीन संकल्पना मांडल्या व यशस्वी केल्या. हीच उमेद व जोश घेऊन आता सातासमुद्रापार ‘एसएससीबीसीएल’(SSCBCL) चे आयोजन करत पुन्हा एकदा मनोरंजनाच्या नव्या आरंभासाठी मराठी चित्रपटसृष्टी सज्ज होत आहे.