मुंंबई (विशेष प्रतिनिधी) : मुंबई महापालिकेत स्वीकृत नगरसेवकांची संख्या पाच वरून वाढवून दहा करण्याचा निर्णय घेण्यात आला असून यासाठी दहा स्वीकृत नगरसेवकांच्या नावाची घोषणा येत्या बुधवार २५ फेब्रुवारी रोजी महापालिका सभागृहात केली जाणार आहे. त्यामुळे कोणत्या पक्षाकडून कुणाची वर्णी लागते याकडे सर्वांचे लक्ष लागून आहे.
मुंबई महापालिकेत सध्या २२७ नगरसेवक निवडून आले असून आजवर महापालिकेत पाच स्वीकृत नगरसेवकांची नियुक्ती प्रत्येक पक्षाच्या गणसंख्येवर आधारीत कोट्यानुसार केली जाते. परंतु यंदा नगरविकास खात्याने अधिसूचना जारी करून स्वीकृत नगरसेवकांची संख्या दुप्पट वाढवत दहा एवढे सुचित केले आहे. त्यामुळे आता २२७ नगरसेवकांची निवड झाल्यानंतर महापालिका सभेला सुरुवात झालेली आहे.त्यामुळे पहिल्या सभेपासून पुढील एक महिन्याच्या आतमध्ये स्वीकृत नगरसेवकांची निवड होणे आवश्यक आहे. त्यानुसार महापालिका सभागृहात येत्या २५ फेब्रुवारी रोजी स्वीकृत नगरसेवकांच्या नावाची घोषणा केली जाणार आहे. यासाठी स्वीकृत नगरसेवकांचे अर्ज प्राप्त होऊन आयुक्तांच्या माध्यमातून या अर्जांची छाननी झाल्यानंतर पात्र अर्जदारांची नावे सभागृहापुढे मांडली जाणार आहे. त्यामुळे यासाठी येत्या सोमवारी स्वीकृत नगरसेवकांचे अर्ज सादर केले जाणार आहे.
स्वीकृत नगरसेवक पदासाठी वकील, प्रोफेसर, डॉक्टर किंवा खासगी स्वयंसेवी संस्थेचे पदाधिकारी, प्रमुख तसेच मंडळाचे प्रमुख अशाप्रकारची अर्हता आहे. त्यामुळे प्रत्येक पक्षाच्या कोट्यानुसार या अर्हतेत बसणाऱ्या किती माजी नगरसेवकांचा आणि पक्षाच्या पदाधिकाऱ्यांची यामध्ये वर्णी लागते याकडे सर्वांचे लक्ष आहे. मुंबई महापालिकेत भाजप पक्षाचे अधिक नगसेवक निवडून आल्यामुळे त्यांचे चार स्वीकृत नगरसेवक महापालिकेवर जात आहेत, तर त्याखालोखाल उबाठाचे तीन,राष्ट्रवादी काँग्रेसची मदत घेतल्यामुळे शिवसेनेचा एक जायचा तिथे आता दोन जाणार आहेत. तर काँग्रेसचा एक अशाप्रकारे स्वीकृत नगरसेवक नियुक्त केले जाणार आहेत.
स्वीकृत नगरसेवकांचे महापालिकेतील संख्याबळ
भाजप : ०४
उबाठा : ०३
शिवसेना : ०२
काँग्रेस : ०१