चेन्नई : इब्राहिम झद्रानच्या वादळी फलंदाजीनंतर मोहम्मद नबीने केलेल्या भेदक गोलंदाजीच्या जोरावर अफगाणिस्तानने कॅनडाचा ८२ धावांनी धुव्वा उडवला. २०-२० षटकांच्या या सामन्यात अफगाणिस्तानने सर्वच विभागात सरस कामगिरी केली.
प्रथम फलंदाजी करताना अफगाणिस्तानने २० षटकांत ४ बाद २०० धावांचा डोंगर उभा केला. सलामीवीर इब्राहिम झद्रानने ५६ चेंडूंत ७ चौकार आणि ५ षटकारांसह नाबाद ९५ धावांची अप्रतिम खेळी केली. त्याला रहमानुल्लाह गुरबाज (३०) आणि सिद्दीकुल्लाह अटल (४४) यांनी मोलाची साथ दिली. कॅनडाच्या जसकरण सिंगने ३ बळी घेतले, मात्र त्यासाठी त्याने ५२ धावा मोजल्या.
२०१ धावांच्या मोठ्या लक्ष्याचा पाठलाग करताना कॅनडाचा डाव सुरुवातीपासूनच गडगडला. अनुभवी मोहम्मद नबीने आपल्या फिरकीची जादू दाखवत ४ षटकांत केवळ ७ धावा देऊन ४ बळी टिपले. कर्णधार रशिद खानने १९ धावांत २ बळी घेत त्याला उत्तम साथ दिली. कॅनडाला २० षटकांत ८ बाद केवळ ११८ धावांपर्यंतच मजल मारता आली. हर्ष ठाकर (३०) आणि साद बिन जफर (२८) यांचा अपवाद वगळता कॅनडाचा एकही फलंदाज तग धरू शकला नाही.
थोडक्यात धावफलक:
अफगाणिस्तान: २० षटकांत २००/४ (इब्राहिम झद्रान ९५, सिद्दीकुल्लाह अटल ४४; जसकरण सिंग ३/५२)
कॅनडा: २० षटकांत ११८/८ (हर्ष ठाकर ३०, साद बिन जफर २८; मोहम्मद नबी ४/७, रशिद खान २/१९)
निकाल: अफगाणिस्तान ८२ धावांनी विजयी.