आयची-नागोया : जपानमध्ये सुरू असलेल्या आशियाई क्रीडा स्पर्धा २०२६ (Asian Games 2026) मध्ये भारताचा युवा मल्ल सुजीत कलकल (Sujit Kalkal) याने इतिहास रचला आहे. शुक्रवारी झालेल्या पुरुषांच्या ६५ किलो फ्री-स्टाईल कुस्तीच्या अंतिम सामन्यात सुजीतने ताजिकिस्तानच्या अब्दुलमजिद कुदीवचा थरारक पराभव करत भारतासाठी सुवर्णपदक पटकावले.
११ सेकंद शिल्लक असताना पलटवला सामना
अंतिम सामन्यात एक वेळ अशी होती की, सामना संपायला अवघा १ मिनिट ४० सेकंदांचा वेळ बाकी होता आणि सुजीत २-९ असा तब्बल ७ गुणांनी मागे पडला होता. परंतु, हार न मानता सुजीतने एकामागून एक जबरदस्त 'टेकडाऊन' दाव मारत सामन्याचे चित्रच पालटून टाकले. सामना संपायला अवघे ११ सेकंद शिल्लक असताना त्याने विजय खेचून आणला आणि सुवर्णपदकावर आपले नाव कोरले. २०१८ च्या जकार्ता आशियाई स्पर्धेत बजरंग पुनिया आणि विनेश फोगट यांनी मिळवलेल्या सुवर्णपदकानंतर, कुस्तीतील भारताचे हे पहिलेच आशियाई सुवर्णपदक ठरले आहे.
मुंबई : वर्षभरातील सर्वात बहुप्रतिक्षित चित्रपटांपैकी एक असलेला 'दृश्यम: द कन्क्लुजन' (Drishyam The Conclusion ) अखेर चित्रपटगृहांमध्ये प्रदर्शित झाला आहे. दिग्दर्शक ...
पदकांची संख्या ७५ वर पोहोचली
सुजीतच्या या ऐतिहासिक विजयामुळे आशियाई क्रीडा स्पर्धा २०२६ मधील भारताची एकूण पदकसंख्या ७५ वर पोहोचली आहे. भारताच्या खात्यात सध्या १५ सुवर्ण, २५ रौप्य आणि ३५ कांस्य पदके जमा आहेत.
असा रंगला अंतिम थरार
सामन्याच्या सुरुवातीला ताजिकिस्तानच्या मल्लाने आक्रमक पकड घेत सुजीतला रिंगणाबाहेर ढकलून आणि पायास पकडून ४-० अशी आघाडी घेतली होती. सुजीतने २ गुण मिळवून पुनरागमन करण्याचा प्रयत्न केला, पण पहिल्या सत्रात प्रतिस्पर्ध्याने सुजीतचा तोल ढासळल्याचा फायदा घेत ९-२ अशी भक्कम आघाडी मिळवली. मात्र, शेवटच्या १ मिनिट २० सेकंदात सुजीतने सलग २-२ गुणांचे दाव मारत ही पिछाडी भरून काढली आणि अखेरच्या क्षणी ९-९ अशा स्थितीतून बाजी मारत सुवर्णपदक जिंकले.
ऑलिम्पिक विजेत्याला धूळ चारून गाठली होती अंतिम फेरी
अंतिम सामन्याआधीही सुजीतने अप्रतिम कामगिरी केली होती. उपांत्य फेरीत त्याने जपानच्या विद्यमान ऑलिम्पिक विजेत्या कियोकाला ३-३ अशा गुणांच्या बरोबरीत 'लास्ट पॉईंट' (अखेरचा गुण) नियमाच्या आधारे धूळ चारली होती. त्याआधी त्याने १६ च्या फेरीत अफगाणिस्तानच्या सय्यद उमर झझाईचा आणि उपांत्यपूर्व फेरीत इराणी मल्ल अब्बासचा पराभव करून अंतिम फेरीत धडक मारली होती.
रिंगणात भारतीय बॉक्सर्सची जादू : लवलीना, परवीन आणि अंकुशला सुवर्णपदक
बॉक्सिंगच्या रिंगणात भारतीय मुष्टियोद्ध्यांनी प्रतिस्पर्ध्यांची पुरती धुळधाण उडवली. भारताची स्टार बॉक्सर लवलीना बोर्गोहेन हिने आपल्या वाढदिवशी देशाला सुवर्णपदकाची खास भेट दिली. महिलांच्या ७५ किलो वजनी गटात तिने चीनच्या बाओ जियीचा तिन्ही फेऱ्यांमध्ये पराभव करत सुवर्णपदक जिंकले. दुसरीकडे, ६५ किलो वजनी गटात परवीन हिने चिनी तैपेईच्या चेन निएन-चिनचा पराभव करत सोन्यावर नाव कोरले. तर पुरुषांच्या ८० किलो वजनी गटात अंकुश पंघाल याने कोरियाच्या किम मिनसियोंगला मात देत भारताच्या झोळीत आणखी एक सुवर्णपदक टाकले.
तिरंदाजीत महिला रिकर्व्ह संघाचा ऐतिहासिक पराक्रम
यंदाच्या आशियाई स्पर्धेत भारतीय तीरंदाजांनी आपली वेगळी छाप पाडली आहे. महिलांच्या रिकर्व्ह संघ प्रकारात कुमकुम, कीर्ती आणि अंकिता या त्रिकुटाने अंतिम फेरीत दक्षिण कोरियाच्या बलाढ्य संघाला धूळ चारत पहिल्यांदाच ऐतिहासिक सुवर्णपदकावर ताबा मिळवला. तर दुसरीकडे, रिकर्व्ह मिक्स टीम इव्हेंटमध्ये कुमकुम आणि धीरज यांच्या जोडीला अंतिम लढतीत चीनकडून पराभव पत्करावा लागल्याने रौप्यपदकावर समाधान मानावे लागले.