विरार: दारूच्या नशेत विषारी जातीच्या सापाला पकडणे आणि अति उत्साहाच्या भरात सापसोबतच मस्ती करणे विरार येथील एका युवकाच्या जीवावर बेतले आहे. पकडलेल्या सापाने दंश केल्यामुळे येथील ४० वर्षीय तरुणाचा मृत्यू झाला आहे. या घटनेचा व्हिडिओ सध्या सोशल मीडियावर व्हायरल होत असून संबंधित तरुण सापसोबत मस्ती करताना दिसत आहे.
सापाची छेड काढणे आणि विनाकारण त्याच्याशी खेळणे हे अनेक सर्पमित्रांच्या आणि नागरिकांच्या जीवावर घेतल्याच्या अनेक घटना यापूर्वी घडल्या आहेत .अशीच एक घटना विरार पश्चिम मध्ये घडली आहे. एका व्यक्तीने सापासोबत केलेली मस्ती त्यांच्या अंगलट आली असून या घटनेचा व्हिडीओ सध्या सोशल मीडियावर मोठ्या प्रमाणात व्हायरल होत आहे.
विरार पश्चिमेच्या नवापूर येथील भागात साप आला होता. याच वेळी मद्याच्या नशेत असलेल्या एका तरुणाने त्याला पकडले. व त्यांच्या सोबत मस्ती सुरू केली होती.या सापासोबतचा हा स्टंट त्याला भलताच भारी पडला.सदर युवक सापासोबत मस्ती करीत असताना याच सापाने त्याला दंश केला. त्यामुळे तेथील नागरिकांनी त्याला तातडीने जवळच्या खारोडी येथील महापालिकेच्या रुग्णालयात उपचारासाठी दाखल केले होते. मात्र उपचारापूर्वीच त्याचा मृत्यू झाला असल्याचे डॉक्टरांनी सांगितले.राजू चंदू बरड (४०) असे या मयत तरुणाचे नाव आहे. साप गळ्यात घेऊन फिरत असताना त्याच्या हाताला दंश केला त्यामुळे त्याचा मृत्यू झाला. या प्रकरणी अर्नाळा सागरी पोलीस ठाण्यात आकस्मात मृत्यूची नोंद करण्यात आली असल्याची माहिती पोलिसांनी दिली आहे.