नवी दिल्ली : राजस्थानमधील अलवर येथे दिल्ली-मुंबई एक्सप्रेसवेवर एका भरधाव खाजगी बस आणि केमिकल टँकरमध्ये भीषण टक्कर झाली. हा अपघात इतका भीषण होता की, यामध्ये ४ प्रवाशांचा जागीच मृत्यू झाला, तर सुमारे ३० जण गंभीर जखमी झाले आहेत. अपघाताच्या वेळी बस प्रवाशांनी खचाखच भरलेली होती. घटनेची माहिती मिळताच स्थानिक पोलीस आणि बचाव पथकाने धाव घेत तातडीने मदतकार्य सुरू केले. जखमींना जवळच्या रुग्णालयात दाखल करण्यात आले असून, काहींची प्रकृती चिंताजनक असल्याचे समजते. अपघातामुळे महामार्गावर काही काळ मोठी वाहतूक कोंडी झाली होती, मात्र पोलिसांनी अपघातग्रस्त वाहने बाजूला करून रस्ता वाहतुकीसाठी मोकळा केला आहे. या दुर्घटनेमुळे संपूर्ण परिसरात हळहळ व्यक्त केली जात आहे.
बस चालक आणि एका महिलेचा जागीच मृत्यू
राजस्थानमधील अलवर जिल्ह्यातून जाणाऱ्या दिल्ली-मुंबई एक्सप्रेसवेवर 'चॅनल १०० इंटरचेंज' पुलाजवळ एक हृदयद्रावक दुर्घटना घडली. एका भरधाव प्रवासी बसची केमिकल वाहून नेणाऱ्या टँकरशी समोरासमोर भीषण धडक झाली. या भीषण संघर्षात बस चालक, एक महिला आणि दोन निष्पाप बालकांचा जागीच मृत्यू झाला. अपघाताची तीव्रता इतकी मोठी होती की बसमधील ३० हून अधिक प्रवासी गंभीर जखमी झाले असून त्यांच्यावर सध्या पिनान येथील आरोग्य केंद्रात उपचार सुरू आहेत. घटनेची माहिती मिळताच रायथी पोलीस ठाण्याचे एसएचओ बनय सिंग आणि 'NHAI'च्या बचाव पथकाने युद्धपातळीवर धाव घेत मदतकार्य राबवले. रुग्णवाहिकेच्या साहाय्याने जखमींना तातडीने रुग्णालयात हलवण्यात आले असून, मृतदेह शवविच्छेदनासाठी पाठवण्यात आले आहेत. या अपघातामुळे द्रुतगती मार्गावरील सुरक्षिततेचा प्रश्न पुन्हा एकदा ऐरणीवर आला असून, पोलिसांनी दोन्ही अपघातग्रस्त वाहने बाजूला करून वाहतूक सुरळीत केली आहे.
मदत वेळेवर मिळाली असती तर...
दिल्ली-मुंबई एक्सप्रेसवेवर झालेल्या भीषण अपघातानंतर आता प्रशासकीय यंत्रणेच्या ढिसाळ कारभारावर प्रवाशांनी ताशेरे ओढले आहेत. अपघात घडल्यानंतर सुमारे दोन तास पोलीस घटनास्थळी पोहोचले नसल्याचा खळबळजनक आरोप जखमींनी केला असून, यामुळे स्थानिक नागरिकांमध्ये तीव्र संताप व्यक्त केला जात आहे. पोलिसांच्या या दिरंगाईमुळे मदतकार्यात उशीर झाल्याची भावना प्रवाशांनी बोलून दाखवली. दरम्यान, या अपघाताचे नेमके कारण अद्याप स्पष्ट झालेले नाही. प्राथमिक अंदाजानुसार, वाहनाचा अतिवेग आणि चालकाचा निष्काळजीपणा या दुर्घटनेला कारणीभूत असावा, अशी शक्यता सूत्रांनी वर्तवली आहे. पोलिसांनी आता घटनास्थळाचा रीतसर पंचनामा केला असून, विविध कोनातून तपास सुरू केला आहे. अपघाताचा सविस्तर अहवाल समोर आल्यानंतरच दोषींवर कारवाईची दिशा स्पष्ट होईल, असे सांगण्यात येत आहे.