महिलांचे लैंगिक शोषण करणाऱ्या आणि स्वतःला दैवी पुरुष असल्याचे भासवून अनेकांची आर्थिक फसवणूक करणाऱ्या खरातला आज पुन्हा न्यायालयात हजर करण्यात आले होते. भोंदू खरातला पाचव्या गुन्ह्यात ६ मे पर्यंत न्यायालयीन कोठडी सुनावण्यात आली आहे. त्यामुळे त्याची रवानगी आता कारागृहात होणार आहे. तर सहाव्या गुन्ह्याच्या (Case) तपासासाठी अशोक खरात (Ashok Kharat) याला ताब्यात घेण्यासाठी एसआयटीकडून (SIT ) न्यायालयाला पत्र देण्यात आले आहे.
दरम्यान, अशोक खरातची आज पाचव्या गुन्ह्यात रवानगी नाशिकरोडच्या मध्यवर्ती कारागृहात (Nashik Road Central Jail) होईल. त्यानंतर वैद्यकीय तपासणीनंतर एसआयटी पुन्हा खरातला सहाव्या गुन्ह्यात ताब्यात घेणार आहे. यानंतर उद्या (शुक्रवारी) त्याला सहाव्या गुन्ह्याच्या संदर्भात न्यायालयात हजर केले जाणार आहे.
अशोक खरातविषयी थोडक्यात...
नाशिकमधील स्वतःला आध्यात्मिक गुरु व अंकशास्त्रज्ञ म्हणवून घेणारा भोंदू अशोक खरात (Ashok Kharat) हा लैंगिक शोषण, फसवणूक आणि बनावट खाती उघडून ५७ लाखांहून अधिक रुपयांचा अपहार केल्याप्रकरणी अटकेत आहे. SIT (विशेष तपास पथक) या प्रकरणाचा तपास करत असून, त्याच्यावर अनेक गंभीर गुन्हे दाखल आहेत. यापूर्वी झालेल्या एसआयटीच्या चौकशीत अनेक धक्कादायक खुलासे झाले आहेत. आजपासून तो न्यायालयीन कोठडीत असणार आहे तर उद्या त्याला पुन्हा न्यायालयात हजर करण्यात येणार आहे.
मुळचा सिन्नरचा असलेला लक्ष्मण एकनाथ खरात, दहावी नापास असून, नंतर तो 'अशोक खरात' नावाने 'कॅप्टन' असल्याचे सांगत लोकांना फसवत असे. लोकांच्या श्रद्धेचा फायदा घेऊन त्याने अनेकांची आर्थिक लूट तर केलीच शिवाय अनेक महिलांचे लैंगिक शोषण देखील केले. खरातच्या मुलीच्या नावावर १०० कोटींची मालमत्ता असल्याचा संशय असून, या प्रकरणी दुहेरी कारवाई सुरू आहे. उच्चपदस्थ अधिकारी, राजकारणी आणि व्यावसायिकांना जाळ्यात ओढून तो कोट्यवधींची माया गोळा करत होता, अशी माहिती समोर आली आहे.