पुणे : पुणे जिल्ह्यातील भोर तालुक्यातील नसरापूर येथे मानवतेला काळीमा फासणारी एक अत्यंत संतापजनक घटना उघडकीस आली आहे. वासरू दाखवण्याच्या बहाण्याने एका ६५ वर्षीय वृद्धाने साडेतीन वर्षांच्या निष्पाप चिमुकलीला जनावरांच्या गोठ्यात नेऊन तिच्यावर पाशवी अत्याचार केले. आपले बिंग फुटू नये म्हणून या नराधमाने चिमुकलीची निर्घृण हत्या केली आणि तिचा मृतदेह गोठ्यातच दडवून ठेवण्याचा प्रयत्न केला. मुलगी बेपत्ता असल्याने शोधाशोध करणाऱ्या कुटुंबीयांना तिचा मृतदेह त्याच गोठ्यात आढळून आल्याने मोठा धक्का बसला. या भयंकर घटनेमुळे संपूर्ण परिसरात संतापाची लाट उसळली असून, पुणे ग्रामीणचे पोलीस अधीक्षक संदीपसिंग गिल यांनी या प्रकरणाची गंभीर दखल घेत तपासाबाबतची माहिती दिली आहे.
पोलीस अधीक्षक संदीपसिंग गिल यांनी म्हटलंय...
नसरापूर येथील भीषण घटनेवर बोलताना पुणे ग्रामीणचे पोलीस अधीक्षक संदीपसिंग गिल यांनी स्पष्ट केले की, काल संध्याकाळी ४ वाजेच्या सुमारास हा संतापजनक प्रकार घडला. सव्वा पाच वाजता पोलिसांना याची माहिती मिळताच त्यांनी तातडीने तपासाची चक्रे फिरवली आणि अवघ्या दीड तासात आरोपीच्या मुसक्या आवळल्या. मात्र, दुर्दैवाने तोपर्यंत या नराधमाने चिमुकलीवर अत्याचार करून तिची निर्घृण हत्या केली होती. सध्या आरोपीला अटक करण्यात आली असून या प्रकरणाचा सखोल तपास युद्धपातळीवर सुरू असल्याचे गिल यांनी सांगितले.
यापूर्वीही पोक्सोचे गुन्हे; जलदगती न्यायालयात खटला चालवणार - पोलीस अधीक्षक
या प्रकरणातील ६५ वर्षीय आरोपी हा मजुरीचे काम करत असून, तो सराईत गुन्हेगार असल्याची धक्कादायक माहिती समोर आली आहे. पोलीस अधीक्षक संदीपसिंग गिल यांनी सांगितले की, या विकृत नराधमावर यापूर्वी १९९८ मध्ये विनयभंगाचा आणि २०१५ मध्ये पोक्सो तसेच विनयभंगाचा गुन्हा दाखल होता. मात्र, २०१९ मध्ये तो सुटून बाहेर आला होता. त्याची मानसिकताच गुन्हेगारी स्वरूपाची असल्याचे पोलिसांनी स्पष्ट केले आहे. या गंभीर प्रकरणाचा तपास एका विशेष पथकाद्वारे केला जात असून, लवकरात लवकर दोषारोपपत्र (चार्जेसशीट) दाखल करून हा खटला फास्ट ट्रॅक (जलदगती) न्यायालयात चालवण्याचे आश्वासन पोलिसांनी नागरिकांना दिले आहे.
सीसीटीव्हीने फोडले नराधमाचे बिंग...
उन्हाळ्याच्या सुट्टीत आजीच्या गावी आलेल्या एका निष्पाप चिमुकलीचा असा दुर्दैवी शेवट होईल, याची कोणी कल्पनाही केली नव्हती. दुपारच्या वेळी मुलगी अचानक बेपत्ता झाल्यावर घाबरलेल्या कुटुंबीयांनी सर्वत्र शोधाशोध केली. मात्र ती कुठेच सापडली नाही. अखेर परिसरातील सीसीटीव्ही फुटेज तपासले असता, हा नराधम आरोपी तिला गोठ्याकडे घेऊन जाताना स्पष्ट दिसला आणि या भयंकर गुन्ह्याचा उलगडा झाला. या अमानुष घटनेमुळे संपूर्ण गावात प्रचंड संतापाची लाट उसळली असून, संतप्त ग्रामस्थांनी या घटनेचा तीव्र निषेध नोंदवत आरोपीला लवकरात लवकर कठोर शिक्षा देण्याची जोरदार मागणी केली आहे.