गुवाहाटी : आसामच्या राजकीय इतिहासात मंगळवारी (१२ मे) एका नव्या पर्वाची नोंद झाली. विधानसभा निवडणुकीत भारतीय जनता पक्षाने मिळवलेल्या घसघशीत यशानंतर, पक्षाचे धडाडीचे नेते हिमंता बिस्वा सरमा (Himant Bisva Sarma) यांनी सलग दुसऱ्यांदा राज्याच्या मुख्यमंत्रीपदाची सूत्रे हाती घेतली. गुवाहाटी येथे पार पडलेल्या एका अत्यंत भव्य आणि दिमाखदार सोहळ्यात, राज्याचे राज्यपाल लक्ष्मण प्रसाद आचार्य (Laxman Prasad Acharya) यांनी त्यांना पद आणि गोपनीयतेची शपथ दिली. विशेष म्हणजे, आसामच्या राजकीय इतिहासात सलग दोन वेळा मुख्यमंत्रीपद भूषवणारे ते पहिलेच 'बिगर-काँग्रेसी' नेते ठरले आहेत. आसाममध्ये राष्ट्रीय लोकशाही आघाडीचे (NDA) हे सलग तिसरे सरकार आहे. याआधी २०१६ मध्ये सर्वानंद सोनोवाल आणि २०२१ मध्ये स्वतः सरमा यांनी मुख्यमंत्रीपदाची धुरा सांभाळली होती.
पंतप्रधानांसह दिग्गजांची मांदियाळी
हा शपथविधी सोहळा केवळ राज्यापुरता मर्यादित न राहता राष्ट्रीय स्तरावर लक्षवेधी ठरला. या ऐतिहासिक क्षणाचे साक्षीदार होण्यासाठी खुद्द पंतप्रधान नरेंद्र मोदी (Prime Minister Narendra Modi) यांनी विशेष उपस्थिती लावली. त्यांच्यासोबतच केंद्रीय गृहमंत्री अमित शाह, (Amit Shah) संरक्षण मंत्री राजनाथ सिंह, (Rajnath Singh) अर्थमंत्री निर्मला सीतारमण (Nirmala Sitaraman) आणि भाजपचे राष्ट्रीय अध्यक्ष नितीन नवीन (Nitin Naveen) यांसारखे दिग्गज नेते मंचावर उपस्थित होते. शिवाय, देशभरातील एनडीएशासित राज्यांचे अनेक मुख्यमंत्री आणि उपमुख्यमंत्रीही या सोहळ्यासाठी गुवाहाटीमध्ये दाखल झाले होते.
मुख्यमंत्र्यांसोबत 'या' ४ आमदारांनी घेतली मंत्रीपदाची शपथ
आसामच्या नव्या मंत्रिमंडळात मुख्यमंत्री हिमंता बिस्वा सरमा यांच्यासोबतच अन्य चार प्रमुख नेत्यांनीही या भव्य सोहळ्यात मंत्रीपदाची आणि गोपनीयतेची शपथ घेतली. या नव्या मंत्रिमंडळात भाजपच्या अनुभवी नेत्यांसोबतच मित्रपक्षांनाही सामावून घेत राजकीय समतोल साधण्यात आला आहे. यामध्ये भाजपचे ज्येष्ठ नेते रामेश्वर तेली, अतुल बोरा आणि अजंता नियोग यांच्यासह मित्रपक्ष असलेल्या 'बोडोलँड पीपल्स फ्रंट'च्या (BPF) चरण बोरो या नेत्यांचा समावेश आहे. या सर्व नेत्यांचा दांडगा राजकीय अनुभव आणि जनसंपर्क पाहता, हे नवे मंत्रिमंडळ आसामच्या विकासाला अधिक गती देईल, असा विश्वास व्यक्त केला जात आहे.
काँग्रेस सोडण्यापासून ते ईशान्य भारतात भाजप रुजवेपर्यंतचा प्रवास
हिमंता बिस्वा सरमा आज जरी भाजपचे ईशान्य भारतातील सर्वात मोठे आणि प्रबळ नेते मानले जात असले, तरी त्यांची मूळ राजकीय जडणघडण काँग्रेसमध्ये झाली. २०१५ साली जेव्हा त्यांनी काँग्रेसला रामराम ठोकून भाजपचा झेंडा हाती घेतला, तेव्हा आसाममध्ये भाजपचे केवळ पाच आमदार होते. मात्र, सरमा यांनी आपल्या कुशल रणनीती आणि राजकीय चातुर्याच्या जोरावर संपूर्ण ईशान्य भारतात भाजपला बळकटी दिली. त्यांच्या याच संघटन कौशल्याची दखल घेत, २०१६ मध्ये पक्षाने त्यांच्यावर 'नॉर्थ ईस्ट डेमोक्रेटिक अलायन्स' (NEDA) च्या निमंत्रक पदाची मोठी जबाबदारी सोपवली. ईशान्येतील प्रादेशिक पक्षांना भाजपच्या छत्राखाली एकत्र आणण्यात सरमांचा सिंहाचा वाटा आहे. राजकीय विश्लेषकांच्या मते, आज ईशान्य भारतात भाजपचा जो भक्कम पाया उभा आहे, त्याचे प्रमुख शिल्पकार हिमंता बिस्वा सरमा हेच आहेत.
गुवाहाटीच्या कॉटन कॉलेज ते जालुकबारीचे अजेय आमदार
सरमा यांचा शैक्षणिक आणि राजकीय पाया गुवाहाटीमध्येच घातला गेला. कामरूप अकादमीतून शालेय शिक्षण पूर्ण केल्यानंतर, त्यांनी प्रसिद्ध 'कॉटन कॉलेज'मधून राज्यशास्त्र या विषयात बी.ए. आणि एम.ए. पदवी संपादन केली. पुढे गव्हर्नमेंट लॉ कॉलेजमधून कायद्याचे शिक्षण (LLB) घेत गुवाहाटी उच्च न्यायालयात वकिलीही केली आणि २००६ मध्ये गुवाहाटी विद्यापीठातून पीएचडी मिळवली. त्यांच्या राजकीय नेतृत्वाची चुणूक विद्यार्थी दशेतच दिसू लागली होती. १९९१-९२ च्या दरम्यान ते कॉटन कॉलेजच्या विद्यार्थी संघटनेचे सरचिटणीस राहिले आणि पुढे 'ऑल आसाम स्टुडंट्स युनियन' (AASU) मध्ये सक्रिय झाले. १९९० च्या दशकात मुख्य प्रवाहातील राजकारणात (काँग्रेसमध्ये) प्रवेश केल्यानंतर, २००१ मध्ये ते जालुकबारी मतदारसंघातून पहिल्यांदा आमदार म्हणून निवडून आले. विशेष म्हणजे, तेव्हापासून आजतागायत जालुकबारीच्या जनतेने त्यांच्यावर अतूट विश्वास दाखवत त्यांना सलग विजयी केले आहे.
खानापारा मैदानावर जनसागराचा महापूर आणि कडेकोट सुरक्षा
हा बहुचर्चित शपथविधी सोहळा गुवाहाटीच्या विस्तीर्ण अशा 'खानापारा' मैदानावर पार पडला. या भव्यदिव्य कार्यक्रमासाठी प्रशासनाकडून जय्यत तयारी करण्यात आली होती. केवळ राजकीय नेतेच नव्हे, तर तळागाळातील भाजपचे पंचायत अध्यक्ष, सदस्य आणि तब्बल एक लाखांहून अधिक नागरिक या अभूतपूर्व सोहळ्याचे साक्षीदार बनले. पंतप्रधान मोदी आणि केंद्रीय मंत्रिमंडळातील अनेक व्हीआयपी नेत्यांच्या उपस्थितीमुळे संपूर्ण गुवाहाटी शहरात सुरक्षेची अत्यंत कडक पावले उचलण्यात आली होती. राज्य पोलीस दल आणि केंद्रीय सुरक्षा यंत्रणांनी प्रत्येक हालचालीवर बारकाईने लक्ष ठेवत चोख बंदोबस्त ठेवला होता.