चांदवड : मुंबई-आग्रा महामार्गावरील राहुड घाटात (Rahud Ghat) मंगळवारी (दि.२) दुपारच्या सुमारास चार वाहनांमध्ये झालेल्या विचित्र अपघातात (Accident) दोन ठार तर दोन जण गंभीर जखमी झाल्याची हृदयद्रावक घटना घडली आहे. चांदवड बाजूकडून मालेगाव (Malegaon) बाजूकडे जाणाऱ्या हाइड्रा क्रेन, ॲप रिक्षा, पिकअप व आयशर यांच्यात मंगळवारी दुपारी चार वाजेच्या सुमारास भीषण अपघात घडला.
दरम्यान, जखमींवर चांदवड ( Chandwad ) येथील उपजिल्हा रुग्णालयात प्राथमिक उपचार करून अधिक उपचारासाठी मालेगाव येथे पाठविण्यात आले आहे. अपघातामुळे राहुड घाटातील वाहतूक काहीकाळ ठप्प झाली होती.
नेमकं काय घडलं ?
चांदवडकडून मालेगावकडे जाणाऱ्या हायड्रा क्रेन, अॅपे रिक्षा, पिकअप व आयशर यांच्यात मंगळवारी (दि. २) दुपारी चार वाजेच्या सुमारास हा भीषण अपघात घडला. राहुड घाटातील तीव्र उतारावर गतिरोधकाजवळ घडलेल्या या विचित्र अपघातात अब्दुल कय्युम अब्दुल रज्जाक (वय ६२) आणि त्यांचा ११ वर्षीय नातू अब्दुल आहिल अब्दुल रहेमान यांचा जागीच मृत्यू झालाय.
तर योगेश अशोक बाविस्कर (वय २७) आणि बारकू सुभाष वैद्य (वय २३, दोघे रा. खडकी ता. मालेगाव) हे गंभीर जखमी झाले आहेत.अपघातातील जखमींना तातडीने उपचारासाठी रुग्णवाहिकेने चांदवड येथील उपजिल्हा रुग्णालयात दाखल करण्यात आले. तेथे प्राथमिक उपचार करून जखमींना पुढील उपचारासाठी मालेगाव येथे पाठविण्यात आले आहे.
या अपघातातील हायड्रा क्रेन घेऊन जाणारा चालक अनुज संजय सिंह (वय २२) याला पोलिसांनी ताब्यात घेतले आहे.घटनेची माहिती मिळाल्यानंतर मृत व जखमींच्या नातलगांनी चांदवड येथील उपजिल्हा रुग्णालयात गर्दी केली होती. घटनेचा तपास पोलिस निरीक्षक कैलास वाघ यांच्या मार्गदर्शनाखाली चांदवड पोलीस (Chandwad Police) करीत आहेत.