Nashik Vidhan Parishad Election : स्थानिक स्वराज्य संस्था मतदारसंघाच्या निवडणुकीत उमेदवारी अर्ज मागे घेण्यासाठी आज गुरुवार (दि. ४) हा अंतिम दिवस असल्याने राजकीय घडामोडींना वेग आला आहे. महायुतीत सुरू असलेल्या बंडखोरीमुळे ही लढत दुरंगी होणार की तिरंगी, याबाबत उत्सुकता निर्माण झाली आहे. दरम्यान, याबाबतचे चित्र आज स्पष्ट होणार आहे.
महायुतीकडून शिवसेना शिंदे गटाचे अधिकृत उमेदवार म्हणून नरेंद्र दराडे (Narendra Darade) मैदानात आहेत. मात्र भाजप आणि राष्ट्रवादी काँग्रेस अजित पवार गटातील काही नाराज नेत्यांनी अपक्ष उमेदवारी अर्ज दाखल करत थेट आव्हान उभे केले आहे. या निवडणुकीत भाजपचे माजी स्थायी समिती सभापती गणेश गीते (Ganesh Gite) , त्यांचे बंधू गोकुळ गीते Gokul Gite) तसेच प्रसाद हिरे यांनी उमेदवारी दाखल केली आहे. याशिवाय अजित पवार गटाचे गोरख बोडके आणि विष्णुपंत म्हैसधुणे यांनीही रिंगणात उतरत निवडणुकीची रंगत वाढवली आहे.
गणेश गिते माघारीच्या मार्गावर ?
गणेश गिते यांच्या उमेदवारीमुळे महायुतीच्या गोटात चिंतेचे वातावरण निर्माण झाले होते. दरम्यान, मंत्री उदय सामंत (Uday Samant) यांनी नाशिक दौऱ्यात बोलताना मंत्री गिरीश महाजन (Girish Mahajan) हे परिस्थिती हाताळतील आणि गिते यांच्याशी चर्चा करून तोडगा काढतील, असा विश्वास व्यक्त केला होता. त्यानंतर गिरीश महाजन यांच्या प्रयत्नांना सकारात्मक प्रतिसाद मिळाल्याचे बोलले जात असून गणेश गिते माघार घेण्याची शक्यता निर्माण झाली आहे.
गोकुळ गितेंची भूमिका कायम
गणेश गिते यांनी माघारीची तयारी दर्शवल्याची चर्चा असली तरी गोकुळ गिते अद्याप निवडणूक लढवण्याच्या निर्णयावर ठाम असल्याचे समोर येत आहे. त्यामुळे आता भावाची समजूत काढण्याची जबाबदारी गणेश गिते यांच्यावरच आली आहे. विरोधी गटांकडून गोकुळ गिते यांना पाठिंबा मिळण्याची शक्यता वर्तवली जात असल्याने महायुतीचे अधिकृत उमेदवार नरेंद्र दराडे यांच्यासाठी ही डोकेदुखी ठरू शकते. त्यामुळे पुढील काही तासांत राजकीय समीकरणे कोणते वळण घेतात, याकडे सर्वांचे लक्ष लागले आहे.