नांदेड : नांदेड शहरामध्ये शनिवारी (११जुलै) मध्यरात्री एक धक्कादायक आणि खळबळजनक घटना घडली आहे. सचिन यशवंत काळे (वय २४) या युवकावर धारधार चाकूचे वार करून त्याची हत्या करण्यात आली आहे. या प्रकरणी पोलिसांनी चार जणांविरोधात गुन्हा दाखल केला असून, मुख्य संशयित आरोपीसह तिघांना ताब्यात घेतले आहे. प्रेमसंबंधाच्या वादातूनच हा खून झाला असल्याची माहिती पोलिसांच्या प्राथमिक तपासातून समोर आली आहे.
प्राथमिक माहिती नुसार, आरोपी राजेश राजेगोरे याचे सचिन काळे याच्या पुतणीसोबत प्रेमसंबंध होते. या प्रेमसंबंधाला सचिन काळे याचा तीव्र विरोध होता. या कारणावरून त्यांच्यात नेहमी वाद सुरु असायचा. याच वादाचा शेवट करण्यासाठी राजेश राजेगोरे याने आपल्या मित्रांच्या मदतीने सचिनची हत्या करण्याचा कट रचला.
शनिवारी मध्यरात्री सचिन काळे(Sachin Kale) हा नेहमी प्रमाणे कामावरून घरी जात असतांना आसना पूल परिसरात आरोपींनी त्याला रस्त्यात गाठले. जुन्या भांडण उखरून आरोपींनी सचिनवर धारदार चाकूने सपासप वार केले. हा हल्ला इतका भीषण होता कि सचिन गंभीर जखमी झाला आणि घटनास्थळीचं त्याचा तडफडून मृत्यू झाला. या भयंकर घटनेमुळे परिसरात भीतीचे वातावरण निर्माण झाले आहे.
घटनेची माहिती मिळताच विमानतळ पोलिस ठाण्याचे अधिकारी आणि कर्मचाऱ्यांचा ताफा तातडीने घटनास्थळी दाखल झाला. पोलिसांनी मृतदेह ताब्यात घेऊन शवविच्छेदनासाठी रुगणालयात दाखल केले. परिसरातील सीसीटीव्ही फुटेजच्या मदतीने मुख्य आरोपी राजेश राजेगोरे याच्यासह तिघांना बेड्या ठोकल्या.
या प्रकरणात चौथा आरोपी फरार आहे. या प्रकरणात पोलिसांकडून कसून चौकशी सुरु आहे. रस्त्यात झालेल्या या हल्ल्यामुळे संपूर्ण परिसरात कायदा व सुव्यवस्थेबाबत चिंता व्यक्त केली जात आहे.