मुंबई : ऑगस्ट महिन्याच्या सुरुवातीलाच ऑईल मार्केटिंग कंपन्यांनी एलपीजी सिलिंडरचे नवे दर जाहीर केले आहेत. 1 ऑगस्ट 2026 पासून 19 किलोच्या कमर्शिअल गॅस सिलिंडरच्या किमतीत 192 रुपयांची मोठी कपात करण्यात आली आहे. सलग दुसऱ्या महिन्यात कमर्शिअल सिलिंडर स्वस्त झाल्याने हॉटेल व्यवसाय, रेस्टॉरंट आणि इतर व्यावसायिकांना मोठा दिलासा मिळाला आहे. (LPG Cylinder Price)
यापूर्वी जुलै महिन्यातही कमर्शिअल सिलिंडरच्या दरात 183.50 रुपयांची कपात करण्यात आली होती. त्यामुळे अवघ्या दोन महिन्यांत कमर्शिअल सिलिंडर एकूण 375.50 रुपयांनी स्वस्त झाला आहे.
नव्या दरांनुसार, दिल्लीमध्ये 19 किलोचा कमर्शिअल गॅस सिलिंडर आता 2,738 रुपयांना मिळणार आहे. यापूर्वी त्याची किंमत 2,930 रुपये होती. पटनामध्ये सिलिंडरचा दर 3,227 रुपयांवरून 3,018 रुपयांवर आला असून, लखनऊमध्ये हा दर 3,052.50 रुपयांवरून 2,860.50 रुपयांवर आला आहे. (Commercial Gas Cylinder)
मात्र, 14.2 किलोच्या घरगुती एलपीजी सिलिंडरच्या दरात कोणताही बदल करण्यात आलेला नाही. त्यामुळे सर्वसामान्य ग्राहकांना या महिन्यातही कोणताही दिलासा मिळालेला नाही. मुंबईमध्ये घरगुती सिलिंडरची किंमत 941.50 रुपये कायम आहे. तर पुणे आणि बंगळुरूमध्ये हा दर 944.50 रुपये इतकाच राहणार आहे. (LPG Price)
दरम्यान, उज्ज्वला योजनेच्या लाभार्थ्यांसाठी 1 ऑगस्टपासून महत्त्वाचा बदल लागू झाला आहे. केंद्र सरकारने 300 रुपयांच्या एलपीजी सबसिडीची मर्यादा चालू आर्थिक वर्षात केवळ 4 सिलिंडरपर्यंत ठेवली आहे. याआधी ही मर्यादा 9 आणि नंतर 6 सिलिंडरपर्यंत होती. (Ujjwala Yojana)
यामुळे 1 एप्रिल ते 31 जुलै या कालावधीत आधीच 4 सिलिंडर भरून घेतलेल्या उज्ज्वला लाभार्थ्यांना ऑगस्टपासून 300 रुपयांची सबसिडी मिळणार नाही. अशा ग्राहकांना आता इतर ग्राहकांप्रमाणे पूर्ण दराने सिलिंडर खरेदी करावा लागणार आहे. त्यामुळे त्यांच्या गॅसवरील खर्चात थेट 300 रुपयांची वाढ होणार आहे. (Domestic LPG)