सर्व नगरसेवकांना येत्या महिन्याभरात मिळणार टॅब
मुंबई (सचिन धानजी) : मुंबइ महापालिकेतील कारभार पेपरलेस करण्याकडे महापालिका आयुक्त आश्विनी भिडे यांनी पाऊल टाकलेले असतानाच आता सभागृह आणि समित्यांचाही कारभार पेपरलेस करण्यात येणार आहे. यासाठी महापालिकेच्या २३७ नगरसेवकांना टॅब देण्यात येणार असून या टॅब द्वारे सभागृहातील पटलावरील विषय पत्रिका आणि समित्यांच्या संबंधित सदस्यांना विषय पत्रिका उपलब्ध करून देण्यात येणार आहे. टॅबमध्ये एका ऍपद्वारे या प्रस्तावाची सॉफ्ट कॉपी उपलब्ध करून देण्यात येणार आहे. त्यामुळे येत्या एक महिन्यांमध्ये या टॅबचे वाटप करून महापालिका सभागृहासह समित्यांचे कामकाज आधुनिक पध्दतीने पेपरलेस करण्यावर भर दिला जाणार आहे. ( Paperless municipal corporation hall)
मुंबई महापालिकेतील २२७ अधिक १० नामनिर्देशित सदस्यांना सभागृहाच्या पटलावरील मासिक सभेतील विषयांचे प्रस्ताव महापालिका सचिव विभागामार्फत उपलब्ध करून दिला जातो. तसेच स्थायी समिती, शिक्षण समिती, सुधार समिती तसेच १७ प्रभाग समिती या वैधानिक समित्यांसह स्थापत्य शहर आणि स्थापत्य उपनगरे समिती, महिला व बाल कल्याण समिती, विधी व महसूल समिती, आरोग्य समिती आदी समित्यांच्या पटलावरील विषयांचे प्रस्ताव संबंधित सदस्यांना महापालिका सचिव विभागामार्फत पाठवले जातात. हे प्रस्ताव त्यांच्या घरी पाठवले जातात आणि यासाठी महापालिका सचिव विभागामार्फत याचा बटवडा केला जातो. ( Paperless Administration)
परंतु, आता या महापालिका आणि समित्यांमधील नगरसेवकांच्या कामकाज अधिक पारदर्शक करतानाच पेपरलेस करण्यासाठी प्रयत्न केला जात आहे. यासाठी २३७ नगरसेवकांसाठी टॅब खरेदी करण्याची प्रक्रिया आयटी विभागाच्या माध्यमातून सुरु आहे. हे सर्व टॅब ऍपल कंपनीचे असतील आणि १३ इंची या टॅबमध्ये एका ऍपद्वारे पटलावरील प्रस्तावांचे विषय त्यांना पाहता येणार आहे. यामध्ये टॅबची मेमरी फुल होणार नसून ऍप द्वारेच प्रस्ताव पाहता आणि वाचता येणार आहे. यामुळे टॅबच्या खरेदीची प्रक्रिया आता अंतिम टप्प्यात आहे. येत्या महिन्यात हे टॅब उपलब्ध झाल्यानंतर त्याचे प्रशिक्षण संबंधित नगरसेवकांना दिले जाणार आहे. तसेच हे प्रस्ताव वाचण्यासाठी त्याची फाईल उघडण्यासाठी कोड क्रमांक दिला जाणार असल्याची माहिती मिळत आहे. (Mumbai News)