नाशिक : गुजरातच्या वलसाड येथील महिलेला फसवून तिच्याकडून ७७ हजार रुपये उकळल्याप्रकरणी नाशिकच्या फुलेनगर येथील भोंदू विशाल खंडागळे आणि पीडितेचा प्रियकर जीतू पवार यांना न्यायालयाने चार दिवसांची पोलिस कोठडी सुनावली आहे. दोघांना २६ ऑगस्ट रोजी पुन्हा न्यायालयात हजर केले जाणार आहे.
महिलेचे लग्न जमवून देण्याचे आमिष दाखवत खंडागळे याने नाशिकच्या अमरधाम येथे अघोरी पूजा केली होती. या प्रकरणी महाराष्ट्र अंधश्रद्धा निर्मूलन समितीच्या पुढाकाराने शुक्रवारी भद्रकाली पोलिस ठाण्यात जादूटोणाविरोधी कायद्यान्वये गुन्हा दाखल करण्यात आला होता. या प्रकरणात पीडितेचा प्रियकरही सहभागी असल्याचे पोलिस तपासात समोर आले आहे. (Nashik Crime News)
दरम्यान, पीडित महिला अत्यंत गरिबीत आणि बेसहारा असल्याने तिच्या पुनर्वसनाचा प्रश्न निर्माण झाला होता. महाराष्ट्र अंनिसच्या आवाहनाला प्रतिसाद देत हिरावाडी येथील वासल्य वृद्धाश्रम आणि पंचवटीतील माणुसकी बेघर व पुनर्वसन केंद्राने तिची जबाबदारी स्वीकारली आहे. महिला व बालकल्याण विभागाकडून महिलेला प्रशिक्षण देऊन रोजगार उपलब्ध करून देण्यासाठीही प्रयत्न केले जाणार आहेत. (Nashik Crime News)
या भोंदूबाबाने आणखी काही भक्तांची फसवणूक केली असण्याची शक्यता महाराष्ट्र अंनिसने व्यक्त केली आहे. अशा प्रकारे फसवणूक झालेल्या व्यक्तींनी महाराष्ट्र अंनिस किंवा जवळच्या पोलिस ठाण्याशी संपर्क साधावा, असे आवाहन करण्यात आले आहे.