रक्षाबंधन म्हटलं की घराघरांत आनंदाचे वातावरण आणि गोडधोड पदार्थांची रेलचेल असते. अनेकजण बाजारातून मिठाई आणतात, तर काहीजण आवडीने घरातच नवनवीन पदार्थ बनवतात. रवा, मावा आणि दुधापासून आपण नेहमीच वेगवेगळे पदार्थ बनवतो. पण यंदाच्या रक्षाबंधनाला भावासाठी काहीतरी खास आणि शाही बनवायचं असेल, तर 'काजू रोल बर्फी' हा उत्तम पर्याय आहे.
बाजारसारखी मऊसूद आणि तोंडात विरघळणारी काजू रोल बर्फी घरात सोप्या पद्धतीने कशी बनवायची, त्याची सविस्तर रेसिपी खालीलप्रमाणे:
काजू रोल बर्फीसाठी लागणारे साहित्य
1 कप काजू,2 मोठे चमचे दूध, साखर आवश्यकतेनुसार, वेलची पूड, सजावटीसाठी पिस्ता किंवा चांदीचा वर्ख
काजूची पावडर
काजू मिक्सरमध्ये घालून बारीक पावडर करून घ्या. मिक्सर जास्त वेळ चालवू नका, नाहीतर काजूमधील तेल सुटू शकते.
मिश्रण तयार करा
कढईत काजूची पावडर, साखर आणि 2 मोठे चमचे दूध घाला. मंद आचेवर सतत ढवळत राहा. मिश्रण घट्ट होऊन कढई सोडू लागले की गॅस बंद करा. थोडे थंड झाल्यावर हाताला तूप लावून मिश्रण मऊसर मळून घ्या.
रोल तयार करा
काजूचे मिश्रण पोळीप्रमाणे लाटून घ्या. त्यावर पिस्त्याचा हलका थर लावून घट्ट रोल करा.
बर्फी कापा
तयार रोल थोडा सेट होऊ द्या. त्यानंतर धारदार सुरीने समान आकाराचे तुकडे कापा.
सजावट
काजू रोल बर्फीवर पिस्त्याचे काप किंवा चांदीचा वर्ख लावून सजवा. दिसायलाही आकर्षक आणि चवीला भन्नाट!