- छोट्या व्यापाऱ्यांच्या तक्रारींची दखल घेत मध्यम मार्ग काढण्याचे निर्देश
मुंबई : अन्न व औषध प्रशासनाने (एफडीए) सुट्या खाद्यतेलाबाबत घेतलेल्या कठोर निर्णयामुळे अडचणीत आलेल्या तेल उत्पादक (Loose Edible Oil) आणि लहान विक्रेत्यांच्या प्रश्नावर मुख्यमंत्री देवेंद्र फडणवीस (Devendra Fadnavis) यांनी हस्तक्षेप केला आहे. सुट्या खाद्यतेलाच्या विक्रीवर लावण्यात आलेल्या निर्बंधांमुळे छोट्या व्यापाऱ्यांमध्ये निर्माण झालेल्या चिंतेची दखल घेत, ग्राहकांच्या सुरक्षेसोबतच पारंपरिक व्यापारही सुरू राहावा यासाठी एक सर्वसमावेशक आणि लवचिक मानक कार्यप्रणाली (एसओपी) तयार करण्याचे निर्देश मुख्यमंत्र्यांनी एफडीएला दिले आहेत.
एफडीए आयुक्त तुकाराम मुंढे (Tukaram Mundhe) यांच्या नेतृत्वाखालील प्रशासनाने राज्यभर अन्न सुरक्षेची मोहीम तीव्र करत सुट्या किंवा पॅकिंगशिवाय विकल्या जाणाऱ्या खाद्यतेलाच्या विक्रीविरोधात कठोर पावले उचलली होती. तेलाची गुणवत्ता, योग्य लेबलिंग, साठवणूक आणि भेसळ रोखण्याच्या दृष्टीने घेतलेल्या या निर्णयामुळे लहान विक्रेते आणि पारंपरिक तेल व्यापाऱ्यांसमोर संकटाची स्थिती निर्माण झाली होती. अनेक मंत्र्यांनी राज्य मंत्रिमंडळाच्या बैठकीत मुख्यमंत्री फडणवीस (Devendra Fadnavis) यांचे याकडे लक्ष वेधले होते.
अन्न सुरक्षेची आणि गुणवत्तेची काळजी घेतानाच छोट्या व्यावसायिकांच्या व्यवसायावर अनावश्यक गदा येणार नाही, यादृष्टीने मध्यम मार्ग काढणे आवश्यक असल्याचे मुख्यमंत्र्यांनी (Devendra Fadnavis) स्पष्ट केले. तेलातील भेसळ पूर्णपणे रोखली जावी आणि त्याचवेळी पारंपरिक व्यवसाय सुरळीत सुरू ठेवण्याची मुभा देणारी 'एसओपी' तातडीने तयार करावी, असे निर्देश त्यांनी प्रशासनाला दिले आहेत. त्यामुळे एफडीएच्या या नव्या 'एसओपी'कडे आता व्यापारी वर्गाचे लक्ष लागले आहे.
