Shalarth ID Scam : नाशिकच्या बहुचर्चित शालार्थ आयडी घोटाळ्यातील संशयित आणि शेंदुर्णी शिक्षण संस्थेचे अध्यक्ष संजय गरुड यांनी अतिरिक्त सत्र न्यायालयातून अचानक जामीन अर्ज मागे घेतला आहे. जमीन अर्ज अचानकपणे मागे घेतल्याने गरुड यांच्या वकिलांनी कोणती नवीन रणनीती आखली याबद्दल चर्चा रंगायला सुरुवात झाली आहे. मात्र आता गरुड यांनी अचानक जामीन अर्ज मागे घेतल्याने तपासाला आता वेगळे वळण मिळण्याची शक्यता बांधली आहे.
ऐन सुनावणीच्या वेळी अर्ज मागे
संजय गरुड यांना २७ जुलै रोजी सोलापूरच्या (Solapur) फार्महाऊसमधून मध्यरात्री अटक झाल्यापासून वैद्यकीय कारणांचे दाखले देत ते नाशिक जिल्हा रुग्णालयात (Nashik District Hospital) दाखल आहेत. न्यायालयाने त्यांना कोठडी सुनावलेली असतानाही, गेल्या महिनाभरापासून त्यांचा कारागृहाऐवजी थेट रुग्णालयातच मुक्काम असल्याने पोलिसांच्या आणि वैद्यकीय प्रशासनाच्या भूमिकेवर यामुळे प्रश्नचिन्ह उपस्थित केले जात होते. सरकारी पक्ष आणि बचाव पक्षाचा युक्तिवाद पूर्ण झाल्यानंतर गुरुवारी (दि. २७) न्यायालय आपला निकाल देणार होते. मात्र, ऐन सुनावणीच्या वेळी अर्ज मागे घेतल्याने तपासाला नवे वळण मिळाले आहे.
कारागृहात रवानगी की पोलिसांकडून ताबा
दरम्यान आता गरुड यांच्या प्रकृतीबाबत जिल्हा रुग्णालयाकडून विशेष मेडिकल बोर्डाचा अहवाल मागवून त्यांचा डिस्चार्ज निश्चित केला जाण्याची शक्यता आहे. गरुड यांचा जिल्हा रुग्णालयातील आराम संपून आता त्यांची रवानगी मध्यवर्ती कारागृहात होणार की पोलीस त्यांना पुन्हा ताब्यात घेणार, याकडे सर्वांचे लक्ष लागले आहे. गरुड यांच्या या माघारीमुळे पोलीस तपासाचा रोख आक्रमक झाला असून, येत्या काही दिवसांत शालार्थ आयडी घोटाळ्यात आणखी काही बड्या चेहऱ्याचा समावेश होऊ शकतो.