Fake Doctor Fraud : बनावट डॉक्टरने ७० हजारांना गंडा घातला; पैसे परत मिळवण्याच्या नादात निवृत्त शिक्षिकेचे लाखोंचे नुकसान

मुंबई : बनावट डॉक्टर असल्याचे भासवून एका ७० वर्षीय निवृत्त शिक्षिकेची ७० हजार रुपयांची फसवणूक करण्यात आली. विशेष म्हणजे, गमावलेले पैसे परत मिळवण्याच्या प्रयत्नात त्या महिलेने ऑनलाइन मदत शोधली असता, सायबर गुन्ह्यातील पीडितांना पैसे परत मिळवून देण्याचा दावा करणाऱ्या आणखी एका टोळीने त्यांची कथितरित्या मोठी फसवणूक केली. पोलिसांच्या माहितीनुसार, या संपूर्ण प्रकारात महिलेचे लाखो रुपयांचे नुकसान झाले असून पूर्व विभागीय सायबर पोलिसांनी गुन्हा दाखल करून तपास सुरू केला आहे. मुलुंड परिसरात एकट्या राहणाऱ्या या निवृत्त शिक्षिकेला सप्टेंबर २०२५ मध्ये सोशल मीडियावर एका अनोळखी व्यक्तीकडून फ्रेंड रिक्वेस्ट आली. संबंधित व्यक्तीने स्वतःची ओळख अमेरिकेतील फ्लोरिडामध्ये स्थायिक असलेला डॉक्टर म्हणून करून दिली. आपण अमेरिकेत राहत असल्याचा विश्वास निर्माण करण्यासाठी त्याने कथितरित्या अमेरिकन पासपोर्टची प्रतही महिलेला पाठवली.

काही दिवस मेसेजद्वारे संवाद साधल्यानंतर त्या व्यक्तीने आपण दुबईला जात असल्याचे सांगितले. अमेरिकेच्या काही नियमांमुळे रोख रक्कम काढता येत नसल्याचे सांगून त्याने महिलेकडे १५ हजार रुपयांची मदत मागितली. त्यावर विश्वास ठेवून महिलेने त्याला पैसे ऑनलाइन पाठवले. यानंतर त्याने आणखी एक बनाव रचला. आपण दिल्ली विमानतळावर अडकलो असून आपल्याकडे अमेरिकन डॉलर असल्याने कस्टम शुल्क भरण्यासाठी पैशांची गरज असल्याचे त्याने सांगितले. त्याच्या बोलण्यावर विश्वास ठेवून महिलेने आणखी ५५ हजार रुपये हस्तांतरित केले.

यानंतर कथित फसवणूक करणाऱ्यांनी कस्टम अधिकारी असल्याचे भासवणाऱ्या आणखी एका व्यक्तीला महिलेच्या संपर्कात आणले. या व्यक्तीने संबंधित डॉक्टरकडे सुमारे ४० हजार अमेरिकन डॉलर रोख असल्याचा दावा करत भारतीय रुपयांमध्ये दंड भरण्यासाठी १.५५ लाख रुपये मागितले. मात्र, या वेळी महिलेला संशय आल्याने तिने पुढील रक्कम देण्यास नकार दिला. काही काळानंतर, जुलै २०२६ मध्ये आपले आधी गमावलेले ७० हजार रुपये परत मिळवण्याचा मार्ग शोधत असताना महिलेला सोशल मीडियावर सायबर गुन्ह्यांच्या पीडितांना पैसे परत मिळवून देण्याचा दावा करणारी ऑनलाइन जाहिरात दिसली. जाहिरातीतील क्रमांकावर संपर्क साधल्यानंतर एका व्यक्तीने पैसे परत मिळवून देण्याचे आश्वासन दिले. तसेच आरबीआयच्या अधिकाऱ्याशी संपर्क असल्याचा दावा करत विविध शुल्कांच्या नावाखाली पैशांची मागणी सुरू केली.

खाते उघडण्यासाठी १० हजार रुपये आणि जीएसटीच्या नावाखाली ७१ हजार रुपये देण्यास सांगण्यात आले. महिलेने ही रक्कम भरल्यानंतर संबंधित व्यक्तींनी तिच्याशी संपर्क तोडल्याचे पोलिसांनी सांगितले. यानंतरही पैसे परत मिळतील या आशेने महिलेने ऑनलाइन मदत शोधणे सुरूच ठेवले. तिला सोशल मीडियावर आणखी एक जाहिरात दिसली. त्यातून संपर्क साधल्यानंतर एका व्यक्तीने स्वतःला विशेष वकील असल्याचे सांगितले. त्यानंतर आणखी एका व्यक्तीने स्वतःची ओळख दिल्ली सायबर पोलिस अधिकारी म्हणून करून दिल्याचा आरोप आहे.

या व्यक्तींनी मूळ फसवणुकीतील रक्कम एका संपत्ती व्यवस्थापन कंपनीत गुंतवण्यात आल्याचे सांगून महिलेकडून पुन्हा पैसे उकळल्याचा आरोप आहे. पोलिसांच्या माहितीनुसार, ३१ ऑगस्टपर्यंत महिलेने एकूण ८४.३८ लाख रुपये विविध खात्यांमध्ये हस्तांतरित केले होते. या प्रकरणी पूर्व विभागीय सायबर पोलिसांनी गुन्हा दाखल केला असून, पैसे कोणत्या खात्यांमध्ये गेले, या फसवणुकीमागे किती जणांचा सहभाग आहे आणि ऑनलाइन जाहिरातींच्या माध्यमातून आणखी किती लोकांना लक्ष्य करण्यात आले आहे, याचा तपास सुरू आहे.

पैसे परत मिळवून देण्याचे आमिष दाखवणाऱ्या ऑनलाइन जाहिराती आणि अनोळखी व्यक्तींवर विश्वास ठेवू नका, असे आवाहन सायबर पोलिसांकडून करण्यात येत आहे.