मुंबई : मुंबईच्या कोस्टल रोडवर रविवारी, २० सप्टेंबर रोजी पहाटे भरधाव BMW कारचा भीषण अपघात झाला. या दुर्घटनेत तिघांचा मृत्यू झाला असून एक जण गंभीर जखमी झाला आहे. या अपघाताचा थरारक CCTV व्हिडिओ समोर आला असून, त्यामध्ये कार पुलाच्या कठड्याला धडकून हवेत उडत खाली कोसळताना दिसत आहे.(Mumbai Coastal Road Crash 3 Dead)
नेमका अपघात कसा घडला?
मिळालेल्या माहितीनुसार, पहाटे सुमारे ५ वाजून २० मिनिटांच्या सुमारास ही दुर्घटना घडली. मरीन ड्राइव्हवरून हाजी अलीच्या दिशेने जाणारी BMW कार लोटस जेट्टीजवळ, लाला लजपतराय महाविद्यालयासमोर आली असता चालकाचे वाहनावरील नियंत्रण सुटल्याचा प्राथमिक अंदाज आहे. CCTV फुटेजमध्ये कार भरधाव वेगात जाताना, पुलाच्या बाहेरील कठड्याला धडकताना आणि त्यानंतर उंच पुलावरून खाली कोसळताना दिसते. खाली सुरू असलेल्या बांधकामाच्या परिसरात कार आदळली. या धडकेमुळे वाहनाचे मोठे नुकसान झाले.(BMW Crash Mumbai)
तीन विद्यार्थ्यांचा मृत्यू, एकाची प्रकृती गंभीर
या BMW कारमध्ये चार जण प्रवास करत होते. अपघातानंतर सर्वांना तातडीने नायर रुग्णालयात दाखल करण्यात आले. मात्र, डॉक्टरांनी तिघांना मृत घोषित केले, तर चौथ्या तरुणावर गंभीर अवस्थेत उपचार सुरू आहेत. मृतांमध्ये २१ वर्षीय शानय गज्जल, १९ वर्षीय आदित्य जकासनिया आणि १७ वर्षीय धैर्य सेठ यांचा समावेश असल्याचे वृत्त आहे. जखमी तरुणाची प्रकृती गंभीर असल्याचे सांगण्यात आले आहे. हे तरुण अहमदाबादचे रहिवासी असून मुंबईत शिक्षण घेत होते, अशी माहिती समोर आली आहे.(Mumbai BMW Accident CCTV Video)
पोलिसांकडून तपास सुरू
प्राथमिक माहितीनुसार, भरधाव वेगामुळे चालकाचे नियंत्रण सुटल्याचा संशय व्यक्त केला जात आहे. मात्र, अपघाताचे नेमके कारण अद्याप तपासाधीन आहे. पोलिसांकडून CCTV फुटेज आणि इतर पुराव्यांच्या आधारे पुढील तपास सुरू आहे.(BMW Crash Mumbai)