व्हाट्सॲपवर आलं लग्नाचं निमंत्रण आणि उघडताच 6.4 लाख रुपये गायब, प्रकरण वाचून आवाक् व्हाल

तुम्हाला व्हॉट्सॲपवर लग्नाचं निमंत्रण देणारी पत्रिका आली आहे का? तर ती डिजिटल पत्रिका ओपन करण्यापूर्वी जरा थांबा.. ही बातमी वाचा आणि नंतर ठरवा.. कारण अशीच एक निमंत्रण पत्रिका अहमदाबादच्या 71 वर्षीय वृद्ध व्यक्तीला आली आणि काही कळण्याच्या आता 6.4 लाखांचा गंडा घातला गेला. त्यांना ही निमंत्रण पत्रिका ओळखीच्या व्यक्तीच्या मोबाईल नंबरवरून आल्याने त्यांनी सहज क्लिक केलं. पण त्याचा फटका त्यांना आर्थिक रुपाने बसला. पोलिसांच्या माहितीनुसार, त्यांना पाठवण्यात आलेली निमंत्रक पत्रिका काही फोटो आणि पीडीएफ स्वरूपात नव्हती. त्याच्यासोबत एक APK फाईल पाठवली होती. त्यावर क्लिक करताच ती फाईल फोनमध्ये इंस्टॉल झाली आणि सायबर चोरट्यांनी डाव साधला. त्यांना काही कळायच्या आतच त्यांचं बँक खातं रिकामी केलं. मीडिया रिपोर्टनुसार, अहमदाबादच्या मेघानीनगरमध्ये 71 वर्षीय निवृत्त व्यापारी राहतात. त्यांना 15 सप्टेंबरला व्हॉट्सअप निमंत्रण पत्रिका आली होती. हा मेसेज ओळखीच्या नंबर आल्याने त्यांना संशय घेण्याचं कारण नव्हतं. त्यांनी कार्डवर क्लिक केलं आणि APK फाईल डाउनलोड झाली. त्यानंतर त्यांना आलेला मेसेज आपोआप इतर व्हॉट्सॲप नंबरवर पाठवणं सुरू झालं. हा प्रकार घडल्यानंतर दोन दिवसांनी त्यांना बँकेतून पैसे गेल्याचे मेसेज आले. तेव्हा त्यांना कळलं की दोन खात्यातून एकूण 6.4 लाख रुपये काढले गेले आहेत.

APK फाईल नेमकी काय असते?

अँड्रॉईड फोनमध्ये एपीके ॲप इंस्टॉल करण्यासाठी एक फाई असते. ही फाईल गुगल प्ले स्टोरवरून इंस्टॉल केली जाते. पण जेव्हा अनोळखी एपीके व्हॉट्सॲप किंवा दुसऱ्या मेसेजिंग ॲपवरून येते आणि इंस्टॉल करताच ती फोनची परमिशन मागू शकते. या माध्यमातून सायबर चोरट्यांनी मोबाईलवर नियंत्रण मिळवलं आणि बँकेची माहिती चोरली. इतकंच काय तर ओटीपीही इंटरसेप्ट केला.

या चुका करू नका

व्हॉट्सॲवरून आलेली कोणतीही एपीके फाइल इंस्टॉल करू नका. लग्नाचं निमंत्रण देणारी पत्रिका पीडीएफ, जेपीजी, पीएनजी किंवा व्हिडीओ स्वरूपात येते. ओळखीच्या व्यक्तीकडून पत्रिका आली असेल तर ती पत्रिका ओपन करण्यापूर्वी एकदा त्यांना कॉल करा. फोनमध्ये अनोळखी ॲप इन्स्टॉल झाले असतील ते ताबडतोब काढून टाका. इतकंच काय तर बँक अॅपचा पासवर्ड बदला. तुमच्या खात्यातून पैसे गेले असल्यास तात्काळ 1930 सायबर हेल्पलाइनवर तक्रार करा. फसवणुकीची माहिती मिळताच बँकेला खातं फ्रिज करण्यास सांगा.