कॅनडा : कॅनडातील (Canada) मॉन्ट्रियलच्या दक्षिणेकडील भागात शनिवारी, 26 सप्टेंबर रोजी हेलिकॉप्टरचा भीषण अपघात झाला. सेंट-ब्रिज्ड-डी'इबरविल परिसरात महामार्ग 10 जवळील एका शेतात हेलिकॉप्टर कोसळून त्याला आग लागली. या दुर्घटनेत हेलिकॉप्टरमधील चारही जणांचा मृत्यू झाला आहे. अपघाताचे नेमके कारण अद्याप स्पष्ट झालेले नाही.
मिळालेल्या माहितीनुसार, मॉन्ट्रियलपासून सुमारे 55 किलोमीटर आग्नेय दिशेला हा अपघात झाला. दुपारी सुमारे 2:30 वाजता क्यूबेक प्रांतीय पोलिस घटनास्थळी दाखल झाले. पोलिसांनी दिलेल्या माहितीनुसार, हेलिकॉप्टर रांग डेस एकोसे परिसरातील एका शेतात कोसळल्यानंतर त्याला आग लागली होती. काही वेळातच अग्निशमन दलाने आगीवर नियंत्रण मिळवले.
उड्डाणानंतर काही क्षणांतच विमान कोसळले
क्यूबेक पोलिसांच्या माहितीनुसार, हेलिकॉप्टरने उड्डाण केल्यानंतर काही वेळातच ते अडचणीत आले आणि त्यानंतर जमिनीवर कोसळले. मात्र, हेलिकॉप्टर नेमके कुठून उड्डाण केले होते आणि त्याचे गंतव्यस्थान कोणते होते, याबाबत अद्याप माहिती समोर आलेली नाही. हेलिकॉप्टरच्या मालकीचीही अधिकृत माहिती देण्यात आलेली नाही. (Canada Helicopter Crash)
We are aware of the tragic helicopter crash that occurred earlier this afternoon in the Montérégie region of Quebec. Our thoughts are with everyone affected by this tragedy. First responders are currently at the scene of the crash. The safety of civil aviation operations is…
— Steven MacKinnon (@stevenmackinnon) September 26, 2026
या दुर्घटनेत मृत्यू झालेल्या चारही व्यक्तींची ओळख अद्याप पटलेली नाही. अपघातामागील नेमके कारण शोधण्यासाठी तपास सुरू करण्यात आला आहे. कॅनडाच्या ट्रान्सपोर्टेशन सेफ्टी बोर्डाने घटनास्थळी तपास पथक पाठवले आहे. अपघातस्थळाची पाहणी करून हेलिकॉप्टरच्या दुर्घटनेमागील कारणांचा शोध घेतला जात आहे.
दरम्यान, कॅनडाचे केंद्रीय परिवहन मंत्री स्टीव्हन मॅकिनन यांनी या दुर्घटनेबद्दल दुःख व्यक्त केले आहे. आपत्कालीन पथके घटनास्थळी दाखल असून नागरी हवाई वाहतुकीची सुरक्षितता सरकारसाठी महत्त्वाची असल्याचे त्यांनी सांगितले. ट्रान्सपोर्ट कॅनडाकडून या प्रकरणावर लक्ष ठेवण्यात येत असून तपास यंत्रणांना आवश्यक सहकार्य केले जात आहे.
